Idman.biz
Azərbaycan Boccia İdman Federasiyasının prezidenti Vüqar Behbudov Cənubi Koreyanın Seul şəhərində keçirilən Boccia Dünya Çempionatında Azərbaycanı uğurla təmsil edərək bürünc medal qazanan milli komandamızın üzvü Sona Ağayeva ilə görüşüb.
İdman.Biz xəbər verir ki, bu barədə Azərbaycan Boccia İdman Federasiyası məlumat yayıb.
Bildirilib ki, görüşdə Sona Ağayeva ilə yanaşı Boccia İdman Federadiyasının vitse-prezidenti və baş məşqçisi İlham Məhərrəmov, məşqçi Elşən Məhərrəmov və idman mütəxəsisi Elgün Əliyev iştirak edib.
Görüş zamanı Sona Ağayevanın Dünya Çempionatındakı uğurlu çıxışı yüksək qiymətləndirilib. Bu möhtəşəm nəticənin Azərbaycan bocciasının beynəlxalq arenada inkişafının və idmançılarımızın əzmkarlığının daha bir göstəricisi olduğu vurğulanıb.
V.Behbudov əldə etdiyi nəticə münasibətilə idmançımızı təbrik edib və ona gələcək yarışlarda uğurlar arzulayıb.
Qeyd edək ki, boccia dəqiqliyə əsaslanan paralimpiya idman növüdür. O, müəyyən mənada kerlinqi xatırladır, lakin burada daşların əvəzinə toplardan istifadə olunur.
İdmançılar növbə ilə qırmızı və mavi topları atır və ya diyirlədirlər. Məqsəd topları kiçik ağ topa – "cek"ə mümkün qədər yaxın yerləşdirməkdir. Bununla yanaşı, rəqibin toplarını vuraraq kənarlaşdırmaq və ya "cek"in yerini dəyişmək də mümkündür. Bu səbəbdən bocciada təkcə dəqiqlik deyil, taktiki düşüncə də mühüm rol oynayır.
