Arif Əsədov: "Bu qalibiyyətin "Turan Tovuz"a avrokuboklara vəsiqə baxımından önəmi böyükdü"

"Dramatik və maraqlı oyun alındı. Matçın belə olacağını əvvəlcədən düşünmək olardı. Çünki "Turan Tovuz"un "Kəpəz"ə (2:5) məğlubiyyətindən sonra baş məşqçi Kurban Berdıyevin komandanı qarşılaşmaya necə hazırlayacağı maraqlı idi. Bu fikirləri Sport24.az-a açıqlamasında Azərbaycan millisinin sabiq məşqçisi Arif Əsədov deyib.

Təcrübəli mütəxəssis Premyer Liqanın XX turunda keçirilmiş "Qarabağ" - "Turan Tovuz" matçı (1:2) ilə bağlı fikirlərini bölüşüb.

"Kəpəz"lə matçda da 4-5 futbolçu iştirak etmirdi. Bu da məğlubiyyətə bir səbəb idi. İndi isə oyunçuların bəziləri sıraya dönmüşdü və yeni transferlər də meydanda idi. Görüşün sonunadək gərgin mübarizə davam edirdi. "Qarabağ" topa daha çox sahib idi, oyuna diktə edən tərəf oldu. Amma Tovuz təmsilçisi meydanda əzmkarlığı və istəyi ilə seçilirdi. Düşünürəm ki, bu da sonda öz bəhrəsini verdi.

Əsədov qonaqların məğlub duruma düşdükdən sonra sonadək mübarizə apardığını söyləyib:

"Hiss olunurdu ki, "Qarabağ" ikinci qolu vurmasa, "Turan Tovuz" fərqlənəcək. Onlar gözlənilmədən fərqlənirlər, standart vəziyyətlərdə çox yaxşı təsir bağışlayırlar. Bu matçda da standart vəziyyətdən hesabı bərabərləşdirdilər. "Qarabağ" önə atılandan sonra müdafiədə səhv etdilər. Məncə, çox maraqlı oyun alındı. Bu qalibiyyətin "Turan Tovuz"a avrokuboklara vəsiqə baxımından önəmi böyükdü".