Sport24.az
Futbol üzrə milli komandamızın bu axşam Macarıstanda baş tutan yoxlama oyununda Albaniyadan aldığı 1:3 hesablı məğlubiyyətdən sonra komandamızın məşqçisi Arif Əsədov mətbuat konfransı keçirib. Sport24.az-ın Macarıstana ezam olunmuş əməkdaşınının verdiyi məlumata görə, 54 yaşlı mütəxəssis əvvəlcə oyun haqda fikirlərini bölüşdü.
- İlk 20 dəqiqədə zəif oynadıq. Sonradan oyun bərabərləşdi, fasilədən sonra yaxşı fürsətlərimiz də oldu. Komandanın oyunundan razı qaldım.
- İlk yarıda 2-ci hissədəki kimi oynamağa nə mane oldu?
- Rəqib AÇ-yə gedən komandadı. Bəlkə də bu, öz təsirini göstərirdi. Ancaq fasilədən sonra özünəinam gəldi və futbolçularımız yaxşı oynadı, qol imkanları yaratdı.
- Musa Qurbanlı ardıcıl 2-ci dəfə ehtiyatdan oyuna daxil olur və 2-ci qolunu vurur. Bəlkə ona start heyətində yer verəsiniz?
- 90 dəqiqəyə hazır deyil bir sıra oyunçumuz. Ola bilər ki, Musa start heyətində çıxsa, bu faydanı verməsin. Məsələn, Mahir Emreli də 90 dəqiqə oynamağa hazır deyildi. Onlar kimi bir sıra digər futbolçumuz da.
- Emin Mahmudovu əvəzləyən Emil Mustafayev daha xoş təsir bağışladı. Düşünmürsünüz ki, radikal addım atmağın vaxtıdı?
- Doğrudu, Mustafayev oyuna daxil olduqdan sonra ilk 5 dəqiqədə qapıya zərbələr endirdi. Ancaq düşünürəm ki, Bolqarıstanla oyundan daha zəif oynadı. Mahmudova gəlincə, o qədər də pis oynamadı. Mustafayevdə 2-3 kq artıq çəki var. Özünə də dedim ki, millinin düşərgəsinə gəlirsənsə, bunu anlamalı və daha peşəkar davranmalısan.
- Arıqlada biləcəksiniz?
- Millidə bunu tam qaydasına salmaq çətindi. Çünki vaxt məhdudiyyəti var.
CEYHUN ƏLİYEV, Macarıstan
