Idman.biz
Türkiyənin "Fənərbağça" futbol komandasının müdafiəçisi Arçi Braun "Qalatasaray"la derbidən sonra başlayan davaya münasibət bildirib. İngiltərəli futbolçu rəqib komandanın müdafiəçisi Abdülkərim Bardakcıya qarşı sərt ifadələr işlədib.
İdman.Biz "Sporx" nəşrinə istinadən xəbər verir ki, Braun komanda yoldaşı Matteo Genduzini müdafiə etmək üçün qarşıdurmaya qoşulduğunu açıqlayıb.
"Matçın sonunda Abdülkərim Genduzinin saçından tutdu. Mən də onu müdafiə etdim. Sonra boynuma qadın kimi cırmaq atdı. "Qalatasaray"da belə edirlər - insanları cırmaqlayır, qadınlar kimi saçlarından dartırlar. Amma problem deyil, bilirsiniz, onlar belə edirlər", - deyə Braun bildirib.
Futbolçu açıqlaması zamanı boynundakı izləri də jurnalistlərə göstərib.
Bardakcı isə qarşıdurmanı özünün başlamadığını bildirib:
"Videoya baxsanız, ilk kimin hücum etdiyini görərsiniz".
Xatırladaq ki, oktyabrın 26-da keçirilən Türkiyə Super Liqasının doqquzuncu turunun derbisində "Qalatasaray" "Fənərbağça"nı 2:1 hesabı ilə məğlub edib. Final fitindən sonra baş verən davaya görə hər iki futbolçu qırmızı vərəqə alıb.
Qarşılaşmadan sonra "Qalatasaray" 22 xalla turnir cədvəlinin birinci, "Fənərbağça" isə 16 xalla beşinci pilləsində qərarlaşıb.
