Sport24.az
"Real"ın baş məşqçisi Karlo Ançelotti Çempionlar Liqasının 1/4 finalnın Madriddə "Arsenal"a uduzduqları (1:2) cavab matçından sonra fikirlərini bölüşüb. Sport24.az xəbər verir ki, italiyalı mütəxəssis mətbuat konfransında əvvəlcə "Komandanıza nə olub?" sualını cavablandırıb:
"Bu gün təhlil etmək yersizdir, bu uğursuzluğu və bütün zərbələri qəbul etməliyik. Futbolçulara dedim ki, başlarını dik tutsunlar, biz başqa mövsümlərdə bu turnirdə çox şey əldə etmişik. Bu il isə buna bənzər bir şeyə nail ola bilmədik. İdmanda belə olur, məğlubedilməz komandalar yoxdur".
Ançelottiyə gələn mövsüm "Real"da olub-olmayacağı ilə bağlı sual da ünvanlanıb. O bildirib ki, klub rəhbərliyinin istənilən qərarına hörmətlə yanaşacaq: "Yeni mövsüm burda qalıb-qalmayacağımı bilmirəm və bilmək də istəmirəm. Çox şey yaşadıq. Futbolda sevincli və kədərli iki hissə var. Bu gün biz kədərlənirik. Sevinməyə öyrəşmişdik. Mövsüm davam edir, hələ heç nə bitməyib. Klublararası dünya çempionatında komandanın başında mən olacammı? İndi bu barədə danışa bilmərəm. Klub dəyişiklik etmək istəyərsə, qərara hörmətlə yanaşaram".
Xatırladaq ki, Londonda keçirilən ilk oyunda da "Arsenal"a uduzan (0:3) "Real" Çempionlar Liqası ilə vidalaşıb.
