Sport24.az
İncəsənət adamları arasında futbolla maraqlanan, "idman şahı"na azarkeşlik edənlər az deyil. Onlardan biri də 75 yaşlı Xalq artisti İlham Namiq Kamaldı. İlham bəyin azarkeşi olduğu "Şamaxı" bu həftə önəmli qarşılaşmada "Qaradağ Lökbatan"ı məğlub etməklə elitaya yüksəlmək yönündə ciddi addım atmış oldu. Sport24.az-a müsahibə verən Xalq artisti həm "şirlər"in uğuru barədə danışıb, həm də ölkə futbolu ilə bağlı fikirlərini bölüşüb.
- Teatrla futbol arasında nə kimi oxşarlıq var?
- Teatr ilə futbol arasında doğmalıq var. Əgər teatr səhnəsində tamaşaçılar üçün bacarığımızı göstəririksə, futbolçular da yaşıl meydanda oyunları ilə tamaşaçıya zövqlü anlar yaşatmağa çalışırlar.
- Azərbaycan futbolu ilə bağlı fikirlərinizi bilmək maraqlı olardı...
- Sovetlər dönəmində Azərbaycan futbolundan söz düşəndə ilk ağlımıza gələn "Neftçi" idi. Hazırda ölkə futbolundan danışanda Qurban Qurbanov və onun rəhbərlik etdiyi "Qarabağ" gözümüz önündə canlanır. Məhz bu klub XXI əsrdə dövlətimizin və futbolumuzun dünya miqyasında tanınması üçün çox işlər görüb, görür də. Qurban Qurbanovun məşqçilik bacarığı sayəsində bu il Ağdam təmsilçisi avrokuboklarda möhtəşəm çıxış etdi. Könül istərdi ki, tək "Qarabağ" yox, digər klublarımızın da belə uğurlarını görək. Amma reallıq odur ki, bu gün meydanda Azərbaycan futbolunu irəli daşıyan ancaq Ağdam təmsilçisidi.
- Sizcə, digər klublarımız niyə "Qarabağ" səviyyəsinə yüksələ bilmir?
- Futbol mütəxəssisi deyiləm. Bu mövzuda dərindən danışa bilmərəm. Amma futbolumuzu kənardan izləyən biri kimi deyim ki, sanki bizdə idmanın "şah"ına lazımi qayğı göstərilmir, komanda sayı azdı, uşaq futbolunda çatışmazlıqlar var. Düşünürəm ki, nə qədər futbol məktəblərimiz, klublarımız çox olsa, daha yaxşı olar. 10 milyondan çox əhalisi olan ölkə üçün 10 komandalı güclülər dəstəsi həm gülünc, həm də absurddu. Bizdən daha az əhalisi olan ölkələrin güclülər dəstəsində daha çox komanda çıxış edir.Bu yaxında AFFA-da iclas oldu. Komanda sayının artırılmaması ilə bağlı qərar verildi. Məncə, bu qərar futbolumuzu daha 5-10 il geri atacaq.
- "Qarabağ"ın erkən çempion olması adət halına çevrilib. Bir azarkeş kimi belə monoton çempionatı izləmək darıxdırıcı deyil?
- Bu gün hamıya məlumdu ki, "Qarabağ" bütün klublardan üstündü. Könül istərdi ki, çempionluq uğrunda mübarizə son tura kimi getsin və çempionatımız daha da maraqlı olsun. Amma az da olsa, inkişafın közərtisini, canlanmanı hiss edirəm. Bu mövsüm "Zirə", "Sabah", "Neftçi" və "Sumqayıt" mükafatçılar sırasında yer almaq uğrunda əsl döyüşə çıxıblar. Bu az da olsa Premyer Liqaya rəng qatır.
- Siz əslən Şamaxıdansız. Sizə doğma bölgənin təmsilçisi yenidən elitaya qayıtmağa yaxındı. "Şamaxı"nın oyunlarını izləyirsiz?
- Ötən mövsüm imakn daxilində komandanın oyunlarına gedirdim. Bu il isə daha çox nəticələrinə göz gəzdirirəm. Onların "Qaradağ Lökbatan"ı məğlub edərək birinci pilləyə yüksəlməsinə çox sevindim. Komanda Premyer Liqaya qayıtmaq yolunda vacib qələbə qazandı. Şamaxılıların sonuncu oyunda da zəfər qazanıb, güclülər dəstəsinə vəsiqəni təmin edəcəklərinə inanıram.
- Bu sahənin mütəxəssis olmasaz da, azarkeş kimi fikrinizi bilmək istərdik. Ölkənin əsas komandası hələ baş məşqçisiz qalıb. Sizcə, bu posta yerli, yoxsa əcnəbi mütəxəssis dəvət olunmalıdı?
- Bizdə savadlı, bacarıqlı məşqçilər var. Onları qorumaq, dəyər vermək lazımdı. Həmçinin futbol sahəsində yeni kadrlar yetişdirmək, onların inkişafına təkan vermək üçün Almaniya, İngiltərə, İspaniya kimi futbol ölkələrinə kurslara yollamaq lazımdı. Gör-götür dünyasında yaşasaq da, qınımıza çökmüşük və ordan da çıxa bilmirik. Bu vaxta kimi Azərbaycan yığmasında çalışan əcnəbi məşqçilərin heç birindən xeyir görmədik. Odur ki, millimizə yerli mütəxəssis rəhbərlik etməlidi. Yuxarıda qeyd etdiyim kimi öz kadrlarımıza dəyər verib inanmalıyıq.
- Sonda ölkə futbolu ilə istəyinizi deyərdiz...
- İstər teatr. Istərsə də futbolumuzla bir istəyim var. Səhnəmizdə təmizlik, dürüstlük, ədalətli rəqabət, inkişaf görmək istədiyim kimi futbolumuzda da həmin mənzərəni seyr etməyi arzulayıram.
ABDULLA İSMAYILOĞLU
