FIA Formula 1-də mübahisəli mühərrik texnologiyasına aydınlıq gətirməyə çalışır

Beynəlxalq Avtomobil Federasiyası (FIA) "Formula-1" mövsümü başlamazdan əvvəl mübahisəli mühərrik texnologiyası ilə bağlı yaranan müzakirələrə qəti və birmənalı son qoymaq üçün "qara-ağ" həll üzərində işləyir.

İdman.Biz "RacingNews"a istinadla xəbər verir ki, qış fasiləsində yayılan məlumatlara görə bəzi güc qurğusu istehsalçıları, xüsusilə "Mercedes High Performance Powertrains" və "Red Bull Powertrains" texniki reqlamentlərdə nəzərdə tutulan 16:1 sıxılma nisbətini aşaraq 18:1 səviyyəsində işləməyə imkan verən mexanizm hazırlayıblar.

Bu iddialara görə, sıxılma nisbəti pit-leyndə (yarış zamanı bolidlərin xidmət aldığı zona), ətraf mühit temperaturunda ölçülür. Tras üzərində isə bu göstəricini real vaxtda ölçmək üçün texnologiya mövcud deyil. Temperaturun artması ilə genişlənən metallardan istifadə olunacağı təqdirdə, faktiki olaraq 16:1 həddindən yuxarı sıxılma nisbətinə çıxmaq mümkün ola bilər. Hesablamalara əsasən, Avstraliyanın Albert Park trasında bu üstünlük hər dövrə üçün təxminən 0,3 saniyə, 58 dövrəlik yarış məsafəsində isə 17,4 saniyə qazanc deməkdir.

Yanvarın 22-də FIA ilə mühərrik istehsalçıları arasında keçirilən görüşdə əsas mövzu sıxılma nisbətinin yüksək temperatur şəraitində necə ölçülməli olması ilə bağlı metodologiya olub. FIA-nın təkoturacaqlı avtomobillər üzrə texniki direktoru Nikolas Tombazis bildirib ki, bu görüş "zirvə toplantısı" olmayıb və hər hansı böyük qərar qəbul edilməsi məqsədi daşımayıb.

Tombazisin sözlərinə görə, görüş sırf texniki xarakter daşıyıb və iştirakçılar məsələni fikir mübadiləsi yox, mühəndislik problemi kimi müzakirə ediblər. O vurğulayıb ki, FIA mövsümün startında komandaların qaydaları fərqli şəkildə şərh etdiyi bir vəziyyətin yaranmasını qətiyyən istəmir.

Sıxılma nisbəti ilə bağlı iddia edilən texnologiyanın "boşluq" (loophole) olub-olmaması barədə suala cavab verən Tombazis bildirib ki, bu anlayışın özü mübahisəlidir. Onun sözlərinə görə, hazırda konkret qayda pozuntusundan danışmaq tezdir və əsas məqsəd ilk yarışdan əvvəl məsələni tam aydın və mübahisəsiz şəkildə bağlamaqdır.

Eyni zamanda, Avstraliya Qran-prisinə qədər həll tapılmasa, komandaların etiraz müraciəti etməsi ehtimalı da qalır. Tombazis qeyd edib ki, FIA aydınlıq yaratmağa çalışsa da, hər hansı komandanın etiraz edib-etməməsi qurumun səlahiyyətinə daxil deyil. Məqsəd isə elə bir şəffaflıq təmin etməkdir ki, etiraza ehtiyac qalmasın.