Idman.biz
Artıq Venesuelanın sabiq prezident hesab olunan Nikolas Maduronun saxlanılaraq ABŞ-yə aparılması 2026-cı ilin əvvəlində dünyanın ən çox müzakirə olunan hadisəsinə çevrilib.
İdman.Biz xəbər verir ki, bu proses Venesuelanı beynəlxalq gündəmin mərkəzinə çıxarıb.
Maraqlıdır ki, ötən ilin iyun ayında - ABŞ Hərbi Dəniz Qüvvələrinin Venesuela sahillərində qüvvələrini yerləşdirməyə başlamasından az müddət əvvəl – azərbaycanlı idmançılar bu Latın Amerikası ölkəsində səfərdə olublar.
Belə ki, gənc badmintonçular Ülvi Hüseynov və Leyla Camalzadə Venesuelada keçirilən beynəlxalq turnirdə uğurla çıxış ediblər. Onlar əvvəlcə fərdi yarışlarda və qarışıq cütlüklərdə qızıl medal qazanıblar, daha sonra isə həmin ölkədə təşkil olunan digər beynəlxalq turnirdə iki gümüş medala sahib olublar.
Azərbaycan badmintonçularının Venesueladakı çıxışına milli komandanın baş məşqçisi, iranlı mütəxəssis Morteza Validarvi rəhbərlik edib.
O, İdman.Biz-ə müsahibəsində hazırda çətin və qeyri-adi vəziyyətlə üzləşən ölkədəki səfərlə bağlı xatirələrini bölüşüb.
"Badmintonçularımız həm gənclər arasında, həm də elit kateqoriyada keçirilən turnirlərdə əla nəticələr göstərdilər. Mən Latın Amerikası ölkələrində dəfələrlə olmuşam və orada yarışlar yaxşı, lakin ən yüksək səviyyədə təşkil edilmir. Buna baxmayaraq, idman zalları çox təmiz və səliqəli idi", – deyə Validarvi xatırlayıb.
Baş məşqçi venesuelalıların azərbaycanlı idmançılara münasibətini də xüsusi qeyd edib.
"Venesuelalılar bizə böyük hörmət və diqqətlə yanaşırdılar. Onları həm də Azərbaycanın Venesueladan bu qədər uzaqda yerləşməsi təəccübləndirirdi. Məsələn, turnirin təşkilat komitəsinin nümayəndələri Karakas hava limanında bizi dörd saat gözlədilər. Daha sonra Marakay şəhərinə yollandıq. Bu, çox səliqəli və ən əsası, təmiz, keyfiyyətli yolları və inkişaf etmiş infrastrukturu olan bir şəhərdir", – deyə M. Validərvi bildirib.
Mütəxəssis venesuelalıların bir maraqlı xüsusiyyətinə də diqqət çəkib.
"Maraqlıdır ki, çoxları Azərbaycan simvolları olan futbolkalarımızı almaq istəyirdi, lakin öz futbolkalarını bizə verməkdən imtina edirdilər. Bizə izah etdilər ki, üzərində Venesuela bayrağı olan geyimləri xarici vətəndaşlara hədiyyə etmək onlara qadağandır", – deyə məşqçi vurğulayıb.
Ümumilikdə Azərbaycan millisinin baş məşqçisi bu ölkəyə səfərdən məmnun qaldığını bildirib.
"O vaxt şəhərdə çox gəzirdik, yerli sakinlərlə ünsiyyətdə olurduq. Onlar çox səmimi idilər və hər zaman kömək etməyə çalışırdılar. Yenə də ən çox diqqətimizi çəkən məqam hər yerdə müşahidə olunan təmizlik idi", – deyə Morteza Validarvi əlavə edib.
