“Üzgüçülük hamı üçün” layihəsinin final mərhələsinə start verilib

Bakıda Türk Dövlətləri Təşkilatına üzv və müşahidəçi ölkələr arasında "Üzgüçülük hamı üçün" layihəsinin final mərhələsinə start verilib.

İdman.biz xəbər verir ki, mərasim Bakı Su İdman Sarayında baş tutub.

Tədbirdə gənclər və idman naziri Fərid Qayıbov, müavini Mariana Vasileva, nazirliyin İdman şöbəsinin müdiri Elnur Məmmədov, Azərbaycan Üzgüçülük Federasiyasının prezidenti Xanlar Fətiyev, Türkiyə İdman Nazirliyinin şöbə müdiri Hakan Bebek, gənclər və idman mütəxəssisi türkiyəli Nail Polat iştirak ediblər.

Mərasimdə öncə yarış iştirakçılarının paradı keçirilib. Daha sonra Dövlət Himni səsləndirilib.

Gənclər və idman naziri Fərid Qayıbov növbəti idman bayramı münasibətində hər kəsi təbrik edib. O bildirib ki, cəmiyyətimizin sağlam gələcəyi üçün təşkil olunan bu tədbir artıq ikinci dəfədir keçirilir: "Bir çox regionlarımızdan iştirak edən idmançılarımız finalda öz gücünü göstərəcəklər. Bu yarışa qatıldıqları üçün hər kəsə təşəkkür edirik. Biz Türk Dövlətlət Təşkialtının üzvüyük. Türk qardaşlarımıza təşəkkür edirik ki, bu gün yarışımızda iştirak edirlər. Bu, üzgüçülük üzrə ilk beynəlxalq yarışımızdır. Həm qadınlar, həm kişilərdən ibarət 100 iştirakçı burada öz gücünü sınayacaq".

O, ardınca yarışı rəsmi olaraq açıq elan edib.

Qeyd edək ki, final mərhələsin Azərbaycan, Türkiyə, Qazaxıstan və Şimali Kipr Türk Respublikası idmançıları 15 yaş kateqoriyasında yarışacaqlar.

Banuçiçək Hüseynli
İdman.biz