Idman.biz
Braziliyalı MMA döyüşçüsü Mişel Pereyra UFC ilə əməkdaşlığını başa vurub.
İdman.Biz xəbər verir ki, bu barədə "MMA Fighting" nəşrinin insayderi Gilyerme Kruz məlumat yayıb.
Məlumata əsasən, Pereyra əvvəlki müqaviləsinin müddəti bitdikdən sonra UFC ilə yalnız bir döyüşü əhatə edən yeni müqavilə bağlamışdı. Həmin qarşılaşmada o, Bakıda təşkil olunan turnirdə rusiyalı Şarabutdin "Şara Bullet" Maqomedova hakimlərin yekdil qərarı ilə uduzub.
35 yaşlı braziliyalı UFC-də keçirdiyi 16 döyüşdə 10 qələbə qazanıb, 6 dəfə isə məğlub olub. O, son beş görüşünün dördünü məğlubiyyətlə başa vurub.
Xatırladaq ki, Pereyra "Şara Bullet"lə döyüşdən sonra hakimlərin qərarına etiraz etmişdi. O, rəqibinin döyüş zamanı gözünə barmaq saldığını və saçını çəkdiyini, buna baxmayaraq heç bir cəza almadığını bildirərək narazılığını dilə gətirmişdi.
Qeyd edək ki, "Gecənin döyüşü" adına layiq görülən qarşılaşmanın qalibi "Şara Bullet" 100 min dollar məbləğində bonus qazanmışdı.
