Qol.az
Amsterdam "Ayaks" klubunun sabiq futbolçusu və baş məşqçisi Yohan Kroyfun şərəfinə stadionda yeni heykəl qoyulub.
QOL.az xəbər verir ki, abidə holland futbol əfsanəsinin 78 illiyi münasibətilə açılıb.
Bürüncdən hazırlanmış heykəl kral lojasının üzərindəki eyvanda yerləşdirilib. Kroyf fiquru stadionun meydanına baxaraq əli ilə ora işarə edən vəziyyətdə təsvir olunub.
"Bu bürünc heykəl Kroyfun baxışlarını, işinə olan sədaqətini və futbol dünyasına – həm oyunçu, həm də məşqçi kimi – misilsiz töhfəsini daim xatırladacaq bir simvoldur", – deyə klubun yaydığı açıqlamada qeyd olunub.
Kroyf 2016-cı il martın 24-də ağciyər xərçəngindən vəfat edib. 2018/19 mövsümündən etibarən "Ayaks"ın stadionu onun adını (Yohan Kroyf Arena) daşıyır.
