Taleh Məmmədov bu gün xalçaya çıxacaq hər 2 güləşçimizdən medal gözləyir

"Murad Məmmədovun finala çıxmaq və medal qazanmaq şansı yüksəkdir".

Bunu İdman.bizə Azərbaycan millisinin sabiq yunan-Roma güləşçisi Taleh Məmmədov deyib.

O, bu gün Paris-2024 Yay Olimpiya Oyunlarında mübarizəyə başlayacaq yunan-Roma güləşçilərimiz Murad Məmmədov (63 kq) və Sabah Şəriətinin (130 kq) şanslarını dəyərləndirib: "Murad venesuellalı Rayber Xose Rodriges Orozkonu məğlub etdikdən sonra yəqin ki, çinli Cao Liquo ilə görüşəcək. Güləşçimiz asiyalı rəqibinə də rahat qalib gəlməlidir. Yarımfinal görüşü onun üçün bir qədər çətin ola bilər. Amma Məmmədov adını finala yazdıracaq".

Veteran güləşçi Sabah Şəriətinin də medal qazanacağına inanır: "O, ilk görüşdə təcrübəli, 39 yaşlı estoniyalı Heiki Nabi ilə üz-üzə gələcək. Gözlənilməz nəsə olmasa, Şəriəti onu məğlub etməlidir. Ardınca Qazaxıstan və Rumıniya idmançıları gəlir. Belə baxanda təmsilçimiz yarımfinala qədər irəliləməlidir. Amma bu mərhələdə o böyük ehtimalla Kuba və ya İrandan olan güləşçi ilə qarşılaşacaq. Bu görüş isə çox çətin olacaq. Yarımfinalda uduzsa, bürünc uğrunda qarşılaşma da çətin keçəcək. Sabah bu yarışda 5-ci də olar bilər, Kuba və ya İrandan olan rəqibini məğlub edərsə çempion da ola bilər. Çünki bütün güclülər sabahın yer aldığı qrupdadır".

Qeyd edək ki, Murad Məmmədov 1/8 finalda Rayber Xose Rodriges Orozko (Venesuela), Sabah Şəriəti isə eyni mərhələdə Heiki Nabi (Estoniya) ilə üz-üzə gələcək. Yarışa Bakı vaxtı ilə saat 17:00-da start veriləcək.

Emin Ağa
İdman.biz