Report.az
"Sərhədçi" Azərbaycan Basketbol Liqasında "Sabah"a qarşı keçirəcəyi XVI turun oyununa ciddi itkilərlə çıxacaq.
"Report" xəbər verir ki, bu barədə baş məşqçi Evren Alkaya klubun mətbuat xidmətinə açıqlamasında deyib.
Mütəxəssis NTD-yə 84:83 hesabı ilə qalib gəldikləri matçdan sonra ara vermədən növbəti görüşə hazırlaşdıqlarını bildirib:
"Cəmi bir gün istirahətdə oldu. Daha sonra məşqlərimizi davam etdirdik. "Sabah"ın çox güclü komanda olduğunu bilirik. Yaxşı məşqçi ilə meydanda özlərini göstərməyi bacarırlar. Yeni transferlərlə daha da gücləndiklərini deyə bilərik. Biz də onların güclü və zəif tərəflərini öyrəndik, ona uyğun çalışdıq. Qalibiyyət üçün əlimizdən gələni edəcəyik. Amma əsas oyunçularımızdan Milenko Velikoviçin belində ağrılar yarandı. Böyük ehtimalla oynaya bilməyəcək. Eyni zamanda, Antonio Uliyamsın da yüksək temperaturu var".
O, həkimlərdən xəbər gözlədiklərini söyləyib:
"Ümid edirəm ki, onlar meydana çıxa biləcəklər. Marlon Teylor da sağ biləyindən zədələnib və müalicəsi davam edir. Üç önəmli basketbolçumuz olmayacaq. Ümid edirəm ki, digər oyunçularımızla matçı qazana biləcəyik".
Qeyd edək ki, bu gün baş tutacaq "Sərhədçi" - "Sabah" oyunu saat 19:00-da başlayacaq.
