Lent.az
"Mançester Siti"nin baş məşqçisi Xosep Qvardiola "şəhərlilər"ın Çempionlar Liqasında "Real"a hər iki oyunda uduzaraq yarışdan kənarlaşdırılmasından sonra klubdakı gələcəyi ilə bağlı fikirlərini bölüşüb.
Lent.az xatırladır ki, "Mançester Siti" pley-off oyunlarında "Real"a ümumilikdə uduzaraq Çempionlar Liqasından kənarlaşdırılıb (3:6).
"Mən qalmaq və "Mançester Siti"ni çalışdırmağa davam etmək istəyirəm. Bu, mənim planımdır. Mən buna tam əminəmmi? "Bəli, bəli, bəli...", - Qvardiola vurğulayıb.
Qvardiola bu mövsümdə 13-cü məğlubiyyətini alıb və yeni şəxsi antirekordu müəyyənləşdirib. İspaniyalı baş məşqçinin rəhbərliyi altında "Mançester Siti" bu mövsüm bütün turnirlərdə keçirdiyi 40 oyundan 13-də məğlub olub. Qvardiolanın əvvəlki ən pis mövsümü 2019/20 mövsümü olub və o, 59 oyundan 12-də məğlub olub.
"Mançester Siti" Qvardiolanın rəhbərliyi altında ilk dəfə Çempionlar Liqasının 1/8 finalına yüksələ bilməyib. Əvvəllər "şəhərlilər" ardıcıl 11 il bu mərhələyə keçmişdi.
Qvardiola "Real"a qarşı keçirdiyi son 7 oyunun yalnız birində qalib gəlib, son 3 oyunda isə məğlub olub.
"Mançester Siti" Premyer Liqa cədvəlində "Liverpul"dan 17 xal geridə olmaqla dördüncü yerdədir. Fevralın 23-də komandalar "Etihad" stadiumunda üz-üzə gələcək.
