Qrem Potter yenidən Premyer Liqada

İngiltərə Premyer Liqa komandası "Vest Hem" baş məşqçi postu üçün Qrem Potterlə razılığa gəldiyini açıqlayıb.

Xulen Lopeteqi ilə yollarını ayıran "Vest Hem"də Qrem Potter dövrü başlayıb.

Lent.az-ın xarici mediaya istinadla bildirir ki, London komandasının verdiyi açıqlamada Potterlə 2,5 illik müqavilə imzalandığı bildirilib. 

"Qrem Potter, klubu ambisiyalarına uyğun olaraq irəli aparmaq üçün idarə heyəti tərəfindən yekdilliklə seçildi",- klubun saytında qeyd edilib.

Qrem Potter isə "Vest Hem"lə müqavilə imzaladığı üçün xoşbəxt olduğunu və danışıqların müsbət keçdiyini bildirib.

Potter deyib: "Burada olduğum üçün xoşbəxtəm. Mənim üçün vacib olan doğru olduğunu düşündüyüm təklifi gözləmək və uyğun bir klub tapmaq idi. Bu, "Vest Hem"də hiss etdiyim hissdir. Prezident və idarə heyəti komandanı necə irəli aparmaq istədiyimizlə bağlı eyni fikirləri bölüşürlər".

Məşqçilik karyerasına İsveçin "Östersund" komandasında başlayan Qrem Potter oradakı uğurundan sonra "Suonsi Siti" ilə anlaşıb.

49 yaşlı baş məşqçi 51 oyun "Suonsi Siti"ni çalışdırıb və "Brayton"la Premyer Liqada debüt edib.

"Çelsi" Qrem Potterin sərbəst qalma müddəasını ödəyib və onu 2022/23 mövsümü üçün komandanın baş məşqçisi təyin edib. "Çelsi"nin heyətində 31 oyuna çıxan Potter həmin mövsüm komandadan ayrılıb.

"Vest Hem" ötən mövsümün sonunda David Moyes ilə yollarını ayırdıqdan sonra yay transfer pəncərəsində xərclərini geri qaytara bilməyib.

Xulen Lopeteqi ilə baş məşqçi kimi müqavilə imzalayan London təmsilçisinin 20 oyundan sonra 23 xalı var.

Premyer Liqada 14-cü pillədə qərarlaşan "Vest Hem" bu mövsümdə keçirdiyi 20 oyunda 6 qələbə, 5 heç-heçə və 9 məğlubiyyət əldə edib.