Sport24.az
"Futbol adamı". Bu terminə tez-tez rast gəlmək mümkündü. Bundan da çox bu və ya digər şəxs haqqında "Futbol adamı deyil" ifadəsini eşidirik. Bəs bu iki antonim arasındakı fərqi nədə görmək olar?
Sizə dünən 22 İyul Milli Mətbuat Gününə həsr olunmuş tədbirdən bəhs edəcəm. İdman jurnalistləri üçün Peşəkar Futbol Liqasının təşkil etdiyi intellektual yarışma 60-a yaxın həmkarımızı bir araya gətirmişdi. 12 komandanın 11 turdan (hər turda 5 sual) ibarət mübarizə apardığı çempionatda möhtəşəm bir ortam yaranmışdı.
Nəyə görə ab-hava super idi? Çünki təşkilatçılar "futbol adamları" idi. Bəli, Elxan Səmədovla Aslan Şahgəldiyev el dili ilə desək, "zamendə qalmışdı"... müvəqqəti olaraq, əlbəttə. Ancaq tribunadan hər şeyi izləyirdilər. Onların dəst-xəttinin davamçıları isə təmsil etdikləri qurumun rəhbərlirinin güvəninə layiq gənc "futbol adamları" dünənki tədbiri maksimal dərəcədə effektiv təşkil etdilər.
"Misli"nin dəstəyi ilə baş tutan yarışmada heç kəs unudulmamışdı. Elə tədbirin açılışında mərhum həmkarımız Elnur Əşrəfoğlunun yad edilməsi də ən düzgün debüt gedişi idi. Tədbirin aparıcısı Tural Dadaşovun seçilməsi də bütün həmkarlar tərəfindən müsbət qarşılanmışdı. Bəzi hallarda sərt üzünü göstərən (haqlı olaraq) Tural "hesabı almanlar ödəyəcək" deməsə də, əsl "nemes" kimi davrandı: o, ədalətin pozulmasına imkan vermədi. Hətta az əvvəl qeyd etdiyim kimi, hesabı "Misli" ödəsə belə...
Mübarizə də maraqlı idi, tərtib edilən suallar da, verilən cavablar da, yaşanan emosiyalar da... elə masadakı təamlar da "very good" qrupundan idi. Bir məqamı isə PFL-dəki dostlara ötürmə formasında çatdırmaq istəyirəm. Komandaların püşkatmayla formalaşması ideyası marağı artırmır, əksinə, bəxt faktorunu önə çəkir. Buna növbəti analoji yarışmalarda diqqət yetirsəniz, nə xoş bizə.
Bütün hallarda, qalibləri təbrik edirik! Təşkilatçılara, əməyi keçən hər kəsə ilin 1 gününü ömrünü stadionlarda keçirən idman mediasına həsr etdikləri üçün böyük bir təşəkkür!
CEYHUN ƏLİYEV
