Idman.biz
Çenin paytaxtı Pekində insanlar üçün nəzərdə tutulmuş idman növləri əsasında uyğunlaşdırılmış yarış formatında müasir texnologiyaların sınaqdan keçirildiyi ilk dünya humanoid robot oyunları başlayıb.
İdman.biz xəbər verir ki, tədbirin açılış mərasimində çinli artistlər humanoid robotlarla birlikdə çıxış edərək rəqslər, döyüş sənətləri, musiqi alətlərində ifalar və Çin operasından nümunələr təqdim ediblər.
Yarışlar Pekin Olimpiya Parkındakı qapalı konkisürmə stadionunda keçirilir. Oyunlarda 16 ölkədən 280 komanda iştirak edir: onlardan 192-si universitetləri, 88-i isə özəl şirkətləri təmsil edir. Yarışlar 3 gün davam edəcək və robotlar 26 fərqli kateqoriyada bacarıqlarını nümayiş etdirəcəklər.
Proqrama həm idman növləri - qaçış, uzunluğa tullanma, sərbəst hərəkətlər, futbol, həm də praktiki bacarıqların inkişafına yönəlmiş tapşırıqlar daxildir. Bunlara materialların işlənməsi, dərmanların çeşidlənməsi və müxtəlif şəraitlərdə təmizlik işləri daxildir.
İdman.biz
