İdman.biz
Beynəlxalq Olimpiya Komitəsinin prezidenti Tomas Bax qurumun Paris-2024 Yay Olimpiya Oyunlarında iştirakşılarının sayında gender balansına nail olaraq, bu sahədə tam bərabərliyə çatıldığını bildirib. Bəs Azərbaycanın olimpiyaçılarının sırasında bu məsələ nə yerdədir?
İdman.biz Fransa paytaxtındakı multiidman yarışı ilə yanaşı, öncəki olimpiadalarda iştirakımızı da nəzərdən keçirərək bu sahədə vəziyyəti araşdırıb.
Əgər BOK olimpiyaçılar arasında tam bərabərliyi müvafiq qərarlarla yarada bilibsə, ölkələrin kişi və qadın idmançılarının sayı sadəcə onların nəticələrindən asılı bir məsələdir. Ölkələrdə kişi və qadın idmançılara konkret say həddi müəyyənləşdirilmir, sadəcə qadın idmanına diqqət nəticəsində onların imkanları artırıla bilər.
Azərbaycanın Parisə lizenziya qazanan 48 idmançısından 28-i kişi, 20-si qadındır. Göründüyü kimi, tam bərabərlik olmasa da, fərq çox da böyük deyil. Kişi idmançılarımız 58,33, qadınlar 41,67 faiz təşkil edir.
Qadın idmançılarımızın sayının 20-yə çatmasında komandalarımız böyük rol oynayıb. Parisə yollanacaq iki komandamızın hər biri qadınlardan ibarətdir. Bədii gimnastika qrupumuzun 5, basketbol komandamızın 4 üzvü var.
Kişi idmançılqarımızın say üstünlüyünə əsasən boks, güləş və cüdo növləri səbəb olub. 5 boksçumuzun hamısı kişilərdir. 12 güləşçimizdən cəmi 1-i, 9 cüdoçumuzdan 2-si qadınlardır.
Çox sayda iştirakçımız olan növlərdə qadınlar gimnastika (7 nəfər) və basketbolda (4 nəfər) 100 faizli göstəriciyə malikdirlər. Badminton və üzgüçülükdə say bərabərliyi mövcuddur – 1 kişi, 1 qadın. 4 növdə yeganə təmsilçimiz qadın, 3 növdə kişidir.
Azərbaycan komandasının iştirak etdiyi öncəki olimpiadalara nəzər saldıqda ilk üçündə fərq nəzərəçarpan dərəcədə böyük olub. Atlantada 23 idmançımızdan cəmisi 3-ü qadın olub. Sidney və Afinada qadınların sayı iki dəfə artıb 6-ya çatsa da, müvafiq olaraq 25 və 31 kişi idmançı ilə müqayisəsi vəziyyətin çox da dəyişmədiyini göstərir.
Pekindən etibarən bu sahədə ciddi irəliləyiş olub. 8 gimnastın sayəsində Çinə 14 nəfərlə yollanan qadın heyətimiz 44 idmançımızın sırasında 31,82 faiz təşkil edirdi ki, bu da Tokioya qədər ən yüksək göstərici olaraq qalırdı. Londonda 53 idmançıdan 15-i, Rioda isə 56-dan 14-ü qadınlar olub. Tokioda 28 kişi, 16 qadın təmsilçimiz yarışıb. Burada faiz nisbəti 63,64-ün 36,36-ya olub.
Qeyd edək ki, iyulun 26-da Bakı vaxtı ilə saat 21:30-da başlanacaq Olimpiadanın açılış mərasimində üçrəngli bayrağımızı kişi boksçumuz Məhəmməd Abdullayevlə yanaşı, qadın cüdoçumuz Gültac Məmmədəliyeva da daşıyacaq.
Vüqar Məmmədov
