Report.az
"Quba" ilə görüşdə asan qələbə qazanacağımızı düşünürdüm.
"Report" xəbər verir ki, bunu "Ordu"nun basketbolçusu Rüstəm Əliyev klubun mətbuat xidmətinə açıqlamasında deyib.
Kapitan Azərbaycan Basketbol Liqasının V turunda "Quba"ya məğlub olduqları oyun barəsində danışıb:
"Quba" ilə görüşdə asan qələbə qazanacağımızı düşünürdüm. Ancaq belə olmadı. Həm içəridən, həm də 3 xallıq atışlarda dəqiq oynaya bilmədik. Müdafiədə də pis təsir bağışladıq. Xüsusilə sürətli hücumlar üzərində işləyirik. Səhvlərimizi təhlil edirik ki, gələcək matçlarda belə halla qarşılaşmayaq".
O, VI turda üz-üzə gələcəkləri "Sumqayıt" görüşünün çətin keçəcəyini söyləyib:
"Sumqayıt"ı səfərdə məğlub etmişik. Amma bu qarşılaşma daha çətin olacaq. Onlar yeni oyunçularla gücləniblər, rotasiya imkanları artıb. Xüsusilə son matçları göstərir ki, komandada ab-hava dəyişib. Amma biz də meydana yalnız qələbə üçün çıxacağıq. Hazırda bütün diqqətimizi bu oyuna yönəltmişik".
Qeyd edək ki, "Ordu" yer aldığı B qrupunda 8 xalla ikinci sırada qərarlaşıb.
