Idman.biz
"Turnir çox yaxşı keçdi".
Bunu İdman.biz-ə "Ocaq Sport" Klubunun 2013-15-ci il təvəllüdlülərdən ibarət hokkey komandasının baş məşqçisi Aleksandr Blinov deyib.
O, komandasının Birləşmiş Ərəb Əmirliklərinin Dubay şəhərində "Galaxy Cup" beynəlxalq turnirindəki çıxışını dəyərləndirib. Mütəxəssis bildirib ki, turnir bir çox müsbət məqamlarla yadda qalıb: "Yarışa çox ciddi hazırlaşmışdıq. Azərbaycanı təmsil etməyin məsuliyyətini anlayırdıq. Gündəlik məşqlərdə texniki və nəzəri tərəfdən çox işləmişdik. Hazırlaşmaq üçün vaxtımız az olsa da, bunu bacardıq. Komandamızın turnirin ən gənci olmasına və bir çox oyunçunun hokkey oynamağa cəmi 6-8 ay əvvəl başlamasına baxmayaraq, bürünc medal qazandıq. Bu bizim ilk yarışımız olduğu üçün əsas məqsəd oyun təcrübəsi qazanmaq, real oyun və real rəqiblərlə əlaqə qurmaq idi. Məşqdə çox oynayırıq, amma məşq və rəqabət tamam başqa şeylərdir. Komandanın çıxışını "5+"la qiymətləndirirəm, oyunçularımız uğurlu nəticəyə imza atmağı bacardılar".
Blinov gələcək hədəflərini də açıqlayıb: "Qarşımıza böyük məqsədlər qoymuşuq. Artıq müxtəlif ölkələrdə yarışlara dəvətlər var. Hazırda bu variantlar üzərində işləyirik. Ən mühüm məqsəd isə Azərbaycan milli hokkey komandasının beynəlxalq federasiyaya üzv olması, dünya çempionatı və Olimpiada kimi beynəlxalq yarışlarda iştirakını təşkil etməkdir. Bunun üçün zaman lazım olduğunu anlayırıq, ancaq hazırki məqsədlərimiz məhz bunlardır".
Qeyd edək ki, 6 klubun iştirakı ilə təşkil olunan turnirdə hokkeyçilərimiz debüt edib.
Aytac Sahəd
İdman.biz
