İdman.biz
"Paris-2024 Yay Paralimpiya Oyunlarına hazırlığımız yüksək səviyyədə davam edir".
İdman.biz xəbər verir ki, bunu Milli Paralimpiya Komitəsinin (MPK) Milli Paralimpiya Komitəsinin idman şöbəsinin müdiri Şahvələd Vəliyev Azərbaycan İdman Akademiyasının Paris-2024 Yay Paralimpiya Oyunları ilə bağlı təşkil olunan mətbuat konfransında deyib.
O bildirib ki, idmançılar müəyyən testlərdən keçərək çatışmazlıqlar üzərində işləyirlər: "Təlim-məşq toplanışları davam edir. Komandalarımız müxtəlif bölgələrdə hazırlıq keçirlər. Paralimpiadada ölkəmizi bacardığımız qədər layiqincə təmsil edəcəyik. 19 lisenziyaçıdan 11-i ilk dəfə belə mötəbər yarışa qatılacaq. Ümid edirik ki, təcrübəlilərlə yanaşı, onlar da uğur qazanacaqlar".
Vəliyevin sözlərinə görə, Tokio-2020 ilə müqayisədə lisenziya sayının az olmasının səbəbi bir çox paralimpiyaçıların karyerasını başa vurmasıdır: "Parisdə dəqiq medal sayı ilə bağlı danışmaq çətindir".
Qurumun baş katibi Toğrul Rəhimov isə bildirib ki, Paralimpiadada ilk dəfə 7 növdə təmsil olunacağıq: "Növbəti hədəfimiz Milanda keçiriləcək Qış Paralimpiya Oyunlarıdır. 2026-ci ildə ölkəmizi orada yüksək şəkildə təmsil etməyi planlaşdırırıq. Uşaq Paralimpiya İdman Oyunları keçirilib və 700 nəfər iştirak edib. Əsas məqsədimiz uşaqlar arasında da paraolimpiya növlərini geniş şəkildə yaymaqdır".
Tədbirdə komitənin yeni saytının da fəaliyyətə başlayacağı bildirilib.
Qeyd edək ki, avqustun 28-dən sentyabrın 8-dək keçiriləcək Paris Paralimpiadasında Azərbaycan 19 paralimpiyaçı ilə təmsil olunacaq.
Banuçiçək Hüseynli
İdman.biz
