Report.az
Milli Olimpiya Komitəsinin vitse-prezidenti Çingiz Hüseynzadə "Report"a müsahibə verib. Qurum rəsmisi Parisdə keçirilən Yay Olimpiya Oyunlarında verilən medalların keyfiyyətində rast gəlinən qüsurlardan danışıb. O, həmçinin MOK-un bu il keçiriləcək Baş Məclisində gözlənilən addımlarla bağlı sualları cavablandırıb.
- Parisdə keçirilən olimpiadadan sonra medalların keyfiyyətləri ilə bağlı şikayətlər çox idi. Bu yaxınlarda bizim idmançılar da şikayət etdilər. Bu məsələ ilə bağlı hansı addımlar atmısınız və ya atacaqsınız?
- Bu barədə MOK-un mətbuat xidmətindən məlumat verilib. Yay Olimpiya Oyunlarında qazanılan 7 medalın hər birini araşdırıb, daha sonra Beynəlxalq Olimpiya Komitəsinə müraciət ünvanlayacağıq. Yeganə addım budur.
- Ümumiyyətlə, nə vaxtsa, hansısa ölkədə keçirilən olimpiadalardan sonra belə hala rast gəlmişdiniz?
- Xeyr, bu ilk dəfə idi.
- Olimpiadanın gedişində də göründü ki, təşkilatçılıqda ciddi qüsurlar var. Bu problemi də onun davamı hesab etmək olarmı?
- Əlbəttə, eyni şeydir. Bu, Paris-2024-ün Təşkilat Komitəsinin fəaliyyəti ilə bağlı məsələdir.
- Sizcə, Fransanın bu cür məsuliyyətsizliyinin səbəbi nədir?
- Bunu dəfələrlə, elə Fransada olanda da müsahibələrimdə demişdim. Aydın məsələdir ki, Təşkilat Komitəsinin zəifliyi bir çox məsələlərdə özünü göstərdi. Buna görə də ümumi problemdir. Müxtəlif problemlər var idi. Ümumiyyətlə, başqa ölkələrlə müqayisədə Paris olimpiadasında problemlərin sayı daha çox idi.
- Bu il MOK-un Baş Məclisi keçiriləcək. Hansı yeniliklər gözlənilir?
- Bu barədə indidən danışmaq tezdir. Nələrin olacağı hesabatlardan, seçkilərdən asılıdır.
- Uzun illərdir MOK-da faəliyyət göstərirsiniz. Vitse-prezident kimi davam etmək istəyiniz varmı?
- Bu, bir qədər düzgün sual deyil. Seçkilərin nəticəsini görəcəksiniz. Həmişə mətbuata açıq olmuşam. Nəsə fikirlərim olsa, açıqlayacağam.
