Sport24.az
"İyulun 14-də Avropa çempionatının final oyununun yayımı zamanı şərhçimizin səsi və oyunun videogörüntüsü arasında bəzi epizodlarda uyğunsuzluq yaranıb. Buna səbəb AÇ-2024-də ilk dəfə olaraq şərhçinin səsinin internet, görüntünün isə peyk üzərindən ötürülməsi sisteminin tətbiqi olub". Sport24.az xəbər verir ki, bu barədə İctimai TV məlumat yayıb:
"Hörmətli tamaşaçılar, bildiyiniz kimi, İctimai Televiziya və Radio Yayımları Şirkəti Azərbaycanda AÇ-2024-ün rəsmi yayımçısı olub.
İyun ayının 14-dən etibarən bütün dünyanın diqqətlə izlədiyi bu idman turnirini biz də yüksək keyfiyyət və təqdimatda tamaşaçılarımıza nümayiş etdirdik.
Belə ki, çempionatın 51 oyununu milyonlarla tamaşaçı həm efirimizdən, həm də "youtube" kanalımızdan canlı olaraq izləyə bilib.
Azərbaycan televiziya məkanında ilk dəfə olaraq Avropa çempionatının final oyununu şərhçimiz Tural Dadaşov məhz oyun keçirilən stadiondan şərh edib.
Təəssüflə qeyd edirik ki, iyulun 14-də Avropa çempionatının final oyununun yayımı zamanı şərhçimizin səsi və oyunun videogörüntüsü arasında bəzi epizodlarda uyğunsuzluq yaranıb.
Buna səbəb AÇ-2024 -də ilk dəfə olaraq şərhçinin səsinin internet, görüntünün isə peyk üzərindən ötürülməsi sisteminin tətbiqi olub. Sözügedən sistemin tətbiqi nəticəsində çempionat zamanı bir sıra ölkələrin yayımçı telekanalları da eyni vəziyyətlə üzləşiblər.
Qeyd edək ki, efirdən əvvəl edilən test zamanı bu kimi problem qeydə alınmayıb.
Vəziyyətin yaranma səbəbkarı birbaşa İTV olmasa da, problemin aradan qaldırılması üçün tərəfimizdən müvafiq addımlar atıldı.
Təəssüf edirik ki, qısa müddət ərzində texniki nasazlığı aradan qaldırmaq mümkün olmayıb.
Belə bir mötəbər turnirin yayımında hər bir qüsurun izləyicilərin haqlı narazılıqlarına səbəb olduğunu anlayır və bir daha yaranmış vəziyyətdən narahatlıq yaşamış tamaşaçılarımızdan üzr istəyirik".
Qeyd edək ki, Avropa çempionatının final oyunu zamanı şərhçinin səsi və oyunun videogörüntüsü arasında bəzi epizodlarda uyğunsuzluq tamaşaçılarda narazılığa səbəb olub.
