İtaliyalı idmançı Dünya Oyunlarında faciəvi şəkildə vəfat edib

Çinin Çenqdu şəhərində keçirilən Dünya Oyunlarının iştirakçısı, italiyalı Mattia Debertolis vəfat edib.

İdman.biz xəbər verir ki, faciə bir neçə gün əvvəl səmti müəyyənetmə yarışı zamanı baş verib.

Mattia meşə yollarında istiqamətdən çıxaraq azıb. Onun itməsi barədə siqnal GPS cihazı vasitəsilə daxil olub – bu cihaz hər bir səmti müəyyənetmə idmançısı üçün məcburidir. İdmançını tez bir zamanda taparaq hadisə yerində tibbi yardım göstəriblər, lakin Debertolisin huşu özünə gəlməyib. Bundan sonra o, Çinin ən yaxşı xəstəxanalarından birinə yerləşdirilib.

29 yaşlı idmançının həyatını xilas etmək üçün həkimlər dörd gün ərzində reanimasiya şöbəsində əllərindən gələni ediblər. Bu müddətdə onun anası, qardaşı və həyat yoldaşı Çenqduya gəliblər. Amma Debertolis dünyasını dəyişib.

O, yalnız peşəkar idmançı deyil, IT mühəndisi olub. Stokholmda böyük şirkətdə çalışıb. Buna baxmayaraq, o, uzun müddət İtaliya millisinin tərkibində yarışlarda iştirak edib və çoxsaylı mükafatlar qazanıb. Həmçinin o, xizək yarışları və futbolla da məşğul olub.

Onun ölümünə nə səbəb olub? Bu suala hələ dəqiq cavab yoxdur. Beynəlxalq İdman Mətbuatı Assosiasiyası (AIPS) tərəfindən yayımlanan açıqlamada İtaliya mətbuatının fikirləri də yer alır. Bildirilir ki, yarış ekstremal şəraitdə keçirilib – şiddətli istilər və yüksək rütubət idmançının vəziyyətinə təsir etmiş ola bilər. Qeyd edilməlidir ki, səmti müəyyənetmə zədələnmə və təhlükə riski yüksək olan idman növlərdən hesab olunur.

İdman.biz