İdman.biz
Bu gün Kölndə ABRO-2024-ün pley-offunun 4-cü oyunu – İspaniya - Gürcüstan matçı keçiriləcək.
İdman.biz oyun öncəsi komandaların rəqabət tarixini nəzərdən keçirir.
Komandalar indiyə kimi cəmisi 7 dəfə qarşılaşıblar. Ümumi top fərqi 19-4 olmaqla, 6 görüşdə ispanlar qalib gəlib, 1-də gürcülər.
Cənubi qafqazlıların yeganə qələbəsi 2016-cı ilin yoldaşlıq matçına təsadüf edib. O vaxt hələ son Avropa çempionu titulunu daşıyan pireneylilər titulu qorumaq üçün getdikləri yarışın başlanmasına 3 gün qalmış heyətin son sınağını keçirərkən zərbə sayında 17-nin 4-ə, topa sahib olmada 76-nın 24-ə, künc zərbələrində 11-in 0-a olan üstünlüklərinə baxmayaraq, Xetafedə gürcülərdən 0:1-lik məğlubiyyət alıblar.
Komandaların rəqabətinə start isə həmin oyundan 4 il əvvəl dünya çempionatının seçmə oyunlarında verilib. İspanlar səfərdə 1, bir il sonra evdə isə 2 cavabsız qolla qalib gəliblər.
2021-ci ildə mundial seçmələri komandaları yenə üz-üzə gətirib. Gürcüstanda Xviça Kvaratsxeliyanın hesabı açmasına baxmayaraq, İspaniya yekunda 2:1 hesabı ilə qalib gəlib. İspaniyadakı oyunda eyni tərəfin üstünlüyü artıq 4:0 olub.
Komandalar hazırkı Avropa çempionatının seçmələrində də qarşılaşıblar. Hər iki görüş ötən ilin payızında baş tutub. Gürcüstandakı ilk matç qonaqların 7:1 hesablı qələbəsi ilə nəticələnib. Həmin matçın 74-cü dəqiqəsində 16 yaş 50 günlüyündə fərqlənən Lamin Yamal ölkəsinin yığmasının tarixinin həm ən gənc futbolçusu, həm də qol müəllifi olub. Digər matçda Xviçanın qolu yenə gürcülərə yetərli olmayıb. İspanlar evdə 3:1-lik qələbə qazanıblar.
Qeyd edək ki, bu gün oyun saat 23:00-da başlanacaq.
Vüqar Məmmədov
İdman.biz
