Türkiyə millisinin sabiq futbolçusu Gökhan Töre həyat yoldaşı Buket Törenin ona qarşı irəli sürdüyü silahla hədələmə ittihamlarına münasibət bildirib.
O, yayılan məlumatları yalan adlandıraraq bütün ittihamları qəti şəkildə rədd edib. İddialara görə, hadisə oktyabrın 2-də baş verib. Həmin gün spirtli içkinin təsiri altında olan Gökhan seyfdən tapança götürərək qısqanclıq zəminində həyat yoldaşına tuşlayıb. O, həmçinin evdən qiymətli əşyaları və həyat yoldaşına məxsus bahalı saatları aparmaqda ittiham olunur.
Buket Töre əmlakın gizlədilə biləcəyindən ehtiyat edərək məhkəməyə müraciət edib və nikah dövründə əldə olunan əmlaka həbs qoyulmasını istəyib.
Gökhan isə ittihamların heç bir fakt və sənədlə təsdiqlənmədiyini, məqsədin onun nüfuzuna xələl gətirmək olduğunu bildirib. O, həqiqətə uyğun olmayan məlumatları yayan şəxslərə qarşı bütün hüquqi vasitələrdən istifadə edəcəyini açıqlayıb.