"Gəncə" klubunun baş məşqçisi azarkeşlərdən üzr istəyib

"Gəncə" basketbol klubunun baş məşqçisi Halil Atlı azarkeşlərdən halallıq istəyib.

"Report" xəbər verir ki, mütəxəssis klubun mətbuat xidmətinə açıqlamasında Azərbaycan Basketbol Liqasının pley-off mərhələsinin üçüncü matçında "Şəki"yə məğlub olaraq mübarizəni dayandırmalarına münasibət bildirib.

O, komandanın azarkeşlərinə təşəkkür edib:

"Hər şeydən əvvəl mövsum ərzində bizə dəstək verən azarkeşlərə təşəkkür edirəm. Onları sevindirməyə çalışdıq. Mən bura gələndə basketbola küskün olan Gəncə var idi. Bu çempionatda gördüyümüz işlərlə insanların sevgisini təkrar qazanan komanda gördüm. Öz adıma deyə bilərəm ki, qurduğum komandaya görə çox xoşbəxtəm. Oyunçularıma xarakterlərinə və verdikləri mübarizəyə görə minnətdaram. Mənə problem yaşatmadılar. Texniki heyətə, köməkçimə, menecerimizə, həkimə və bizə yardımçı olan hər kəsə təşəkkürümü bildirirəm".

Türkiyəli mütəxəssis əlindən gələni etdiyini vurğulayıb:

"Bu mövsüm "Gəncə" üçün yaxşı işlər görmək istərdik. Arxaya dönüb baxanda kubokda final oynayan, pley-offa vəsiqə qazanan bir kollektiv qurmağı bacardığımızı görürəm. Bura gələndə ilk hədəfimiz yenidən pley-offlarda oynamaq idi. Bu istəyimizə çatdıq. Bütün azarkeşlərdən halallıq istəyirəm. Məşqçi kimi əlimdən gələnin ən yaxşısını etməyə çalışdım. "Sıxıntıları necə dəf edə, yaxşı gördüyümüz işləri necə daha da inkişaf etdirə bilərik" deyə düşündük. Federasiya rəhbərliyinə də təşəkkür edirəm, bizə fəaliyyətimiz üçün yaxşı imkanlar yaratdılar".

Qeyd edək ki, pley-off mərhələsində "Şəki" ilə üç oyun keçirən "Gəncə" ümumi hesabda məğlub olub - 1:2.