İdman.biz
"Basketbolçularımız Parisdə tarix yazdı. Olimpiya Oyunlarının komanda idman növündə Azərbaycan ilk qələbəsini qazandı".
Bunu İdman.bizə 3x3 növü üzrə Azərbaycan millinin basketbolçusu Endər Poladxanlı deyib.
O, qadınlardan ibarət 3x3 komandamızın Paris-2024 Yay Olimpiya Oyunlarında son Olimpiya çempionu ABŞ-ı 20:17 hesabı ilə məğlub etməsinə münasibət bildirib. Poladxanlının sözlərinə görə, qələbənin davamı gələcək: "Millimizin potensialına çox yaxşı bələdəm. İspaniyaya məğlub olduğumuz ilk matçda həyəcan hiss olunurdu və bu, normaldır. Dünənki görüşdə isə rahat basketbol oynadıq və nəticədə amerikalıları məğlub etməyi bacardıq. Fransa ev sahibi olduğu üçün, Almaniya da ilk oyunda ABŞ-ı məğlub etdiyi üçün bu gün bizim üçün asan olmayacaq. Hər 2 oyunun gərgin mübarizə şəraitində keçəcəyini düşünürəm. Qızlarımız hər 2 rəqibi məğlub edəcək gücdədirlər".
Poladxanlı yığmala bağlı proqnozunu da açıqlayıb: "Yığmamız Olimpiya Oyunlarında medal qazansa, təəccüblənməyəcəm. İlk "üçlük"də yer alacağımıza inanıram".
Qeyd edək ki, Azərbaycan bu gün Fransa ilə saat 14:30-da, Almaniya ilə isə 20:30-da oynayacaq.
Emin Ağa
İdman.biz
