İdman.biz
"Olimpiadada görüş idarə etmək çox möhtəşəm idi. Yarışlar həyəcanlı, stressli və gərgin keçdi".
Bunu İdman.bizə azərbaycanlı beynəlxalq dərəcəli boks hakimi Emil Qurbanəliyev deyib.
O, Paris-2024 Yay Olimpiya Oyunlarında döyüşləri ən yaxşı idarə edən ədalət təmsilçisi seçilməsinə münasibət bildirib. Reytinqdə birinci olmaqla dördilliyin ən möhtəşəm yarışının sertifikatı ilə təltif edilən Qurbanəliyev bildirib ki, o, Fransada rinqə çıxan 40 hakimin içərisindən seçilib: "Referilər daim izlənirlər. Əgər hansısa şübhə yaranarsa, dərhal evə yola salırdılar. Buna görə də orada elə çalışdım ki, ölkəmizin adına xələl gəlməsin. Əsas məsələ Azərbaycan adını layiqincə təmsil etmək idi. 20-dən çox görüşdə ədaləti qorudum. Hər bir döyüş özünəməxsus şəkildə yadda qaldı. Boksda digər idman növlərindən fərqli, hər bir hakim görüşə müxtəlif rakusdan baxır. Yarış zamanı çox gərgin idim. Sevinirdim ki, Olimpiyada da iştirak etdim. Çünki burada çalışmaq hər adama qismət olmur".
Onun sözlərinə görə, 5 dəfə rinq, digərlərində yan hakim kimi çalışıb: "Qərarlarımın hər birində düzlüyə önəm verirdim. Döyüşü səhv idarə edən 5 nəfər qırmızı zonaya düşərək uzaqlaşdırıldı. 75 kiloqram çəki dərəcəsində qadınların final görüşünü idarə etdim. Çox xoş oldu. Hiss etdim ki, məni yaxşı qiymətləndirəcəklər. Amma bu qədərini gözləmirdim".
Banuçiçək Hüseynli
İdman.biz
