Bu yay bütün Avropanın diqqəti Almaniyaya yönələcək. Qitənin 24 ən güclü millisi sayca 17-ci Avropa çempionatında mübarizə aparacaq. İyunun 14-dən iyulun 14-dək davam edəcək yarışın startına 9 gün qalıb.
İdman.biz AVRO-2024-ün iştirakçılarının təqdimatını davam etdirir.
Bu həftə E qrupunun komandalarını nəzərdən keçiririk. Belçikanın favorit olduğu qrupda ikincilik uğrunda gərgin mübarizədə Ukraynanın rəqiblərindən biri də Rumıniya olacaq.
Məğlubiyyətsiz bilet
"Cücələr" AVRO-2024-ə vəsiqəni seçmə mərhələdən qazanıb. Qrupu məğlubiyyətsiz başa vuran komanda finişə 1 tur qalmış Almaniya biletini əldə edib. Edvard Yordaneskunun baş məşqçisi olduğu yığma İsveçrə və İsraillə mübarizəni 1-ci yerdə tamamlayıb. "Üçrənglilər" İsveçrə, Belarus, Kosovo səfərlərində, həmçinin İsraillə ev matçında xal itirsə də, bu, onların qrup qalibi olmasına maneçilik törətməyib. IX turda İsraili səfərdə 2:1 yenən Rumıniya Almaniyaya vəsiqə qazandıqdan sonra İsveçrəni qəbul edib. Bir qolla qalib gələn "Karpat uşaqları" 1-ci yeri də əldən verməyib.
Qayıdış
AVRO-2020-dən kənar qalan "sarılar" final mərhələsinə qayıtmaq imkanı əldə ediblər. 8 il əvvəlki yarışın iştirakçısı olan Rumıniya tarixində 6-cı dəfə belə imkan qazanıb. Amma yığmanın qitə çempionatındakı nəticələri göz oxşayan deyil. 5 cəhdin dördündə qrupda qalan millinin yeganə uğuru AVRO-2000-lə bağlıdır. Həmin vaxt Portuqaliya, İngiltərə və Almaniya ilə "Ölüm qrupu"na düşən "Cücələr" 1/4 finala adlasa da, İtaliya səddini keçə bilməyib. Dünya çempionatları isə Rumıniya üçün unudulmuş yarışdır. 7 dəfə mundiala qatılan komanda dörd dəfə 1/8, bir dəfə 1/4 finala qədər irəliləsə də, DÇ-1998-dən sonra seçmə mərhələni keçə bilməyib.
Rumıniya millisinin qrupdakı oyunları:
17 iyun. Rumıniya - Ukrayna
22 iyun. Belçika - Rumıniya
26 iyun. Slovakiya - Rumıniya
Qeyd edək ki, E qrupunun görüşləri 5 fərqli şəhərdə - Ştutqart, Frankfurt, Köln, Münhen və Düsseldorfda keçiriləcək.
Vüqar Xeyrullayev
İdman.biz