Qol.az
"Arsenal"ın baş məşqçisi Mikel Arteta "Real"la Çempionlar Liqasının 1/4 final mərhələsinin cavab oyunundan (2:1) əvvəl "Mançester Siti"nin baş məşqçisi Xosep Qvardiolaya zəng etdiyini bildirib.
QOL.az Britaniya mətbuatına istinadən xəbər verir ki, o, matçdan sonra təşkil edilən mətbuat konfransında bildirib:
"Bu gün səhər "Real"la oyundan əvvəl Qvardiolaya zəng etdim. Çünki əminəm ki, bu gün bu mövqedə olmama görə çox şeydə ona borcluyam. O, həm futbolçu, həm də məşqçi kimi mənim üçün ilham mənbəyi olub. Məni köməkçi məşqçi kimi komandaya dəvət etməklə bu yolda ilk addımı atmağa da məhz o qərar verdi. Mən "Mançester Siti"də onunla dörd möhtəşəm il keçirdim və buna görə ona minnətdaram. Həmişə də minnətdar qalacam, çünki əks halda bu gün burada olmazdım".
Qeyd edək ki, "Arsenal" iki oyunun nəticəsinə görə (3:0, 2:1) "Real"ı məğlub edib (cəmi 5:1) və 16 ildən sonra ilk dəfə Çempionlar Liqasının yarımfinalına yüksəlib. Yarımfinalda onların rəqibi PSJ olacaq. İlk oyun 29 aprel Londonda, cavab oyunu isə 6 mayda Parisdə keçiriləcək.
