Idman.biz
Azərbaycan triatlonu üçün əlamətdar hadisə reallaşıb.
İdman.biz xəbər verir ki, milli komandamızın məşqçisi və təcrübəli hakim Balaheydər Kərimov ilk dəfə olaraq Dünya Triatlonunun yarışında ədaləti qoruyub.
O, avqustun 9-10-da Rumıniyanın İzvorani şəhərində keçirilən yeniyetmələrin Avropa Kubokunda hakimlik edərək beynəlxalq arenada ilk təcrübəsini qazanıb.
Kərimov bildirib ki, gələcəkdə bu işini davam etdirməyə çalışacaq: "Bu yarış mənim üçün böyük təcrübə oldu. Gələcəkdə ölkəmizi daha çox beynəlxalq triatlon yarışlarında layiqincə təmsil etməyə çalışacağam".
Azərbaycan Triatlon Federasiyası Balaheydər Kərimovun beynəlxalq hakim kimi debütünü milli triatlonun inkişafı üçün mühüm addım kimi dəyərləndirib və onun gələcək fəaliyyətinin daha böyük uğurlar gətirəcəyinə inandığını açıqlayıb.
Qeyd edək ki, Kərimov triatlon üzrə gənclərdən ibarət Azərbaycan millisinin baş məşqçisidir. Hakimlik sahəsində də böyük təcrübəyə malik olan mütəxəssis ölkəmizdə keçirilən bir çox yerli və beynəlxalq yarışlarda, o cümlədən "IronWind" beynəlxalq triatlon yarışında baş hakim kimi çıxış edib.
İdman.biz
