Report.az
Azərbaycanın 30 cüdoçusu Yaponiyada təlim-məşq toplanışında iştirak edir.
Bu barədə "Report"a Azərbaycan Cüdo Federasiyasının mətbuat xidmətindən məlumat verilib.
Hazırlıq prosesinə böyüklərdən və gənclərdən ibarət yığmanın üzvləri cəlb ediliblər. Toplanış martın 21-nə qədər davam edəcək.
Düşərgəyə əsas millidə Tokai Universitetində, gənclər isə Kokuşikan Universitetində start verib. Daha sonra idmançılar hazırlığı Kodokan Təlim Mərkəzində davam etdirəcək. Təlim məşqin növbəti hissəsində Yaponiya milli komandasının cüdoçuları da iştirak edəcək.
Hazırlıq prosesi apreldə Monteneqroda baş tutacaq Avropa çempionatına və may ayında keçiriləcək beynəlxalq turnirlərə uzunmüddətli hazırlığın bir hissəsidir.
Hazırlıq prosesində böyüklərdən ibarət yığmaya baş məşqçisi Riçard Trautman və böyük məşqçilər Elçin İsmayılovla Slavko Tekiç, gənclərdən ibarət milliyə isə baş məşqçi Rüstəm Alimli, məşqçilər Elxan Rəcəbli və Kotaro Sasaki rəhbərlik edir.
