Qənirə xanımın xatirəsinə həsr olunan turnirin yüksək səviyyədə keçməsi üçün əlimizdən gələni edirik.

"Report" xəbər verir ki, bunu Azərbaycan Şahmat Federasiyasının (AŞF) vitse-prezidenti Faiq Həsənov tanınmış ictimai-siyasi xadim Qənirə Paşayevanın xatirəsinə həsr olunan beynəlxalq şahmat turnirinin açılış mərasimindən sonra jurnalistlərə açıqlamasında deyib.

Yarışın baş hakimi turnirin yüksək səviyyədə təşkil olunduğunu söyləyib:

"Qənirə xanımın xatirəsinə həsr olunan turnirin yüksək səviyyədə keçməsi üçün əlimizdən gələni edirik. Ona görə turnirin beynəlxalq yarış kimi keçirilməsi qərara alındı. Yarışda digər ölkələrdən olan şahmatçılar da mübarizə aparırlar. Martın 7-də Qənirə Paşayevinin doğum günü olduğu üçün turnir bu ərəfədə baş tutur. Sevindirici haldır ki, yarışda Azərbaycanın qadın şahmatçılardan ibarət millisinin üzvləri çıxış edirlər".

Qeyd edək ki, Azərbaycanı turnirdə Günay Məmmədzadə, Gövhər Beydullayeva, Ülviyyə Fətəliyeva, Gülnar Məmmədova, Xanım Balacayeva və Türkan Məmmədyarova təmsil edəcək. Yarışda həmçinin Nilufər Yakubbayeva (Özbəkistan), Assel Serikbay (Qazaxıstan), Gülenay Aydın (Türkiyə) və Nurgül Səlimova (Bolqarıstan) da iştirak edəcək.

Turnir rapid və blits üzrə təşkil olunacaq. Qalib hər iki növdə nəticənin cəminə əsasən müəyyənləşəcək. Turnirin ümumi mükafat fondu 30 min manat təşkil edir.