Lent.az
Karlo Ançelotti "Barselona" ilə Kral Kubokunun final oyunundan sonra "Real"ın baş məşqçi postunu tərk edəcək.
Lent.az xarici KİV-ə istinadla bildirir ki, mənbənin məlumatına görə, 65 yaşlı italiyalı mütəxəssis aprelin 26-da, Kral Kubokunun finalında "Barselona" ilə oyundan dərhal sonra "Kral Klubu"nu erkən tərk edəcək.
Karlonun Madrid klubu ilə hazırkı müqaviləsi 2026-cı ilin yayına qədərdir.
Mətbuatda Ançelottinin "Bayer"in baş məşqçisi Xabi Alonso ilə əvəz oluna biləcəyi ilə bağlı məlumatlar yayılmışdı.
Karlonun adı da Dorival Juniorun qovulmasından sonra hazırda yeni məşqçi axtarışında olan Braziliya millisi ilə hallanıb.
Ançelotti 2021-ci ildə ikinci dəfə "Real"ın baş məşqçisi olub. O vaxtdan bəri komanda ilə 11 kubok, o cümlədən iki La Liqa və iki Çempionlar Liqası qazanıb.
Madrid klubunun sükanı arxasında ilk dəfə (2013-2015) Ancelotti Kral Kubokunda, Çempionlar Liqasında, UEFA Super Kubokunda və FIFA Klublararası Dünya Kubokunda da qalib gəlib.
Ançelotti futbol tarixinin ən uğurlu məşqçilərindən biridir. O, Avropanın ən yaxşı 5 çempionluğunun hamısını, həmçinin beş Çempionlar Liqasının qalibi olan yeganə məşqçidir – iki dəfə "Milan"la (2003, 2007) və "Real"lə üç dəfə (2014, 2022, 2024).
Mövsümün bitməsinə 7 tur qalmış "Real" La Liqanən turnir cədvəlində "Barselona"dan 4 xal geri qalaraq ikincidir.
