Report.az
ABŞ-də 100 metr məsafəyə qaçışda ikiqat olimpiya mükafatçısı Fred Kerli Mayami-Biçdə həbs edilib.
"Report" xəbər verir ki, bu barədə NBC telekanalı məlumat yayıb.
Qeyd olunub ki, Kerli əvvəlcə avtomobili ilə bağlı polislə danışıb, daha sonra ərazini tərk etməkdən imtina edərək aqressiv davranışlar göstərməyə başlayıb. Bundan sonra idmançıya qarşı tapança tipli elektroşokerdən istifadə edilib və o, saxlanılıb.
İdmançı polis əməkdaşına hücum etmək, ictimai asayişi pozmaq və polisə müqavimət göstərməkdə şübhəli bilinir. Kerlinin 29 yaşı var. O, son iki Olimpiadada 100 metr məsafəyə qaçışda medal qazanıb - Tokioda gümüş və Parisdə bürünc. Onun dünya çempionatında da üç qələbəsi var.
