Zeyd Ələsgərov Dünya Çempionatındakı Bürünc Medalı və Gələcək Hədəfləri Barədə

Bolqarıstanın paytaxtı Sofiyada keçirilən dünya çempionatında bürünc medal qazanan Azərbaycanın yeniyetmə cüdoçusu Zeyd Ələsgərov "Report"un turnirə ezam olunmuş əməkdaşının suallarını cavablandırıb. O, yarışdakı çıxışı barədə danışıb və qarşıdakı hədəflərindən söz açıb.

- İlk olaraq əldə etdiyiniz medalla bağlı fikirlərinizi almaq istəyirik. Hansı hissləri keçirirsiniz?

- Çox sevinirəm. İlk iki rəqibimə qalib gəlmişdim. Sonra 1/4 finalda məğlub oldum. Buna baxmayaraq, ruhdan düşmədim. Təsəlliverici görüşdə, ardınca isə bürünc medal uğrunda qarşılaşmada yaponiyalı cüdoçuya qalib gəldim.

- Yarışa gələndə hədəfiniz nə idi?

- Dünya reytinqində birinci pillədə idim. Bura da iddialı gəlmişdim. Qızıl medal qazanmaq istəyirdim. Amma alınmadı. Qismət belə oldu. İnanıram ki, gənclər kateqoriyasında daha da yaxşı nəticələr göstərəcəyəm.

- 1/4 finalda məğlubiyyətə əsas səbəb nə oldu? Yeri gəlmişkən, həmin idmançı sonradan qızıl medal qazanıb.

- Bəzi səhvlər etdim. Bakıya qayıdandan sonra baş məşqçimiz Emin İskəndərov və məşqçi Nicat Şıxəlizadə ilə həmin səhvlərin üzərində işləyəcəyəm.

- Medal qarşılaşmasından əvvəl məşqçilərlə nə danışdınız?

- Müəllimlər mənə öz tapşırıqlarını verdilər. Ən vacib olan rəqibin sol qolunu tutmaq və yuxarıdan atmaq lazım idi. Bunu da edib qalib gəldim.

- Qazandığın mükafatı kimlərə həsr edirsən?

- İlk növbədə Azərbaycan Cüdo Federasiyasına təşəkkür edirəm. Milli komandanın baş məşqçisi Emin İskəndərova, məşqçi Nicat Şıxəlizadəyə, şəxsi məşqçim İlqar Müşkiyevə minnətdaram. Üzərimdə əməkləri böyükdür. Qazandığım medalı isə ailəmə həsr edirəm.

- Artıq yeniyetmələrin kateqoriyasında iştirak etməyəcəksiniz. Qarşıdakı hədəfləriniz nədir?

- Gənclərdə çəkimi 66 kq-a qaldıra bilərəm. Fiziki hazırlığa önəm verəcəyəm. Qarşıda ağır məşqlər var. Daha güclü qayıdacağam. Gənclər arasında Avropa və dünya çempionu olmağa çalışacağam.

- Hər idmançının karyerası ilə bağlı hansısa arzusu olur. Sizdə nədir?

- Hədəf ilk növbədə idmanda qalmaqdır. Cüdodan uzaqlaşmaq niyyətində deyiləm. Allah qismət etsə, gələcəkdə Yay Olimpiya Oyunlarında iştirak etmək və Vətənə qızıl medalla qayıtmağı arzulayıram.