Sport24.az
"Dünya reytinqində birinci yerdəyəm, amma təbii ki, bununla kifayətlənmək fikrində deyiləm. Gələn il də qələbə seriyamı davam etdirmək niyyətindəyəm". Sport24.az xəbər verir ki, bunu Avropa Cüdo İttifaqının (EJU) saytı Olimpiya və dünya çempionu olan Azərbaycan idmançısı Zelim Kotsoyevdən (100 kq) sitat gətirib.
2024-cü ilin reytinq liderlərini təqdim edən Eju.net cüdoçumuz haqqında da yazıb. Bildirilib ki, Azərbaycan 2024-cü ildə dünya çempionatı və olimpiadada bir qələbə ilə kifayətlənməyib: "Kotsoyev də iki dəfə şöhrətin zirvəsini yaşayıb, onun şərəfinə Abu Dabi və Parisdə Azərbaycan bayraq qaldırılıb və dövlət himni səsləndirilib. Təsadüfə bax, həm Kotsoyev, həm də Heydərov 2017-ci ildə öz çəki dərəcələrində yeniyetmələr arasında dünya çempionu olublar və düz 7 ildən sonra yenidən zirvəyə yüksəliblər. Kotsoyev daim fəxri kürsüdə yer alıb, kadetlər, gənclər və böyüklər arasında Avropa titullarını qazanıb. Dünya turunda - "Böyük Dəbilqə"də isə, 3-ü qızıl daxil olmaqla, 11 medalla öyünə bilər".
Kotsoyev vurğulayıb ki, bu il onun üçün çox məhsuldar olub: "Zəhmətimin bəhrəsi kimi iki böyük turnirdə - dünya çempionatı və Olimpiya oyunlarında qələbə qazanmışam. Motivasiya isə ondan ibarətdir ki, Azərbaycan idman tarixində heç vaxt ikiqat olimpiya çempionu olmayıb. Dostum Heydərovla Los-Ancelesə getmək və ikiqat Olimpiya çempionu kimi tarixə düşmək istəyirik. 2025-ci ildə görüşənədək!".
