İdman.biz
"Səudiyyə Ərəbistanda idman sahəsində çox böyük inkişaf gedir".
Bunu İdman.bizə Azərbaycan millisinin sabiq cüdoçusu Rüstəm Orucov deyib.
Avropa Cüdo İttifaqının idman komissarı kimi çalışan Olimpiya mükafatçımız Səudiyyə Ərəbistanında keçirilən konfransda iştirakını şərh edib. Orucov bildirib ki, onu tədbirə 25 illik təcrübəsinə görə məsləhətlər almaq üçün çağırıblar: "Mən də lazımı məsləhətlərimiz verdim. Səudiyyə Ərəbistanda tək cüdoda deyil, hər idman növü üzrə xaricdən güclü ekspertlər dəvət edilərək, onlarla fikir mübadiləsi aparırlar. Orada yerli Cüdo Federasiyasının nümayəndələrilə görüşdük. Milli Olimpiya Komitəsi, həmçinin idman naziri ilə söhbətimiz oldu, cüdonun inkişaf barədə danışdıq".
Veteran cüdoçu səfərdə hər iki tərəfin razı qaldığını da vurğulayıb: "Mən də Səudiyyə Ərəbistandan pozitiv fikirlərlə qayıtmışam. İdmanın inkişafında çox maraqlıdırlar. Şadam ki, cüdonun inkişafında kiməsə kömək edib, fikirlərimi bölüşürəm".
Qeyd edək ki, Orucov Rio-2016-nın və dünya çempionatının finalçısıdır.
Banuçiçək Hüseynli
İdman.biz
