Idman.biz
Azərbaycanın cüdo üzrə U-21 milli komandası Perunun paytaxtı Limada oktyabrın 5-7-də keçiriləcək dünya çempionatına hazırlaşır.
İdman.biz qarşıdakı yarışla bağlı yığmanın baş məşqçisi Rüstəm Alimli ilə söhbətləşib.
– Yığmanın hazırlığı hansı səviyyədədir? Hansı idmançılar "qızıl" uğrunda mübarizəyə qoşula bilərlər?
– Uşaqlar əla formadadırlar – ilin ən önəmli turnirinə hazır vəziyyətdədirlər. Komandamızda altı cüdoçu var və onların hər biri medal uğrunda mübarizə aparacaq gücə malikdir. Bunlar 60 kiloqram çəkidə Fərid Qarayev və Nihad Məmişov, 66 kiloqramda Nizami İmranov və Məhəmməd Musayev, 81 kiloqramda Süleyman Şükürov, +100 kiloqramda isə Ramazan Əhmədovdur.
– Dünya çempionatında +100 kiloqram çəki dərəcəsində medal qazana biləcək yerli cüdoçumuzun olması çox sevindiricidir. Çünki böyüklər arasında bu çəkidə uzun müddətdir problemlər yaşanır. Amma diqqət çəkən məqam odur ki, 73, 90 və 100 kiloqram çəkidə komandamızın üzvü yoxdur. Bunun səbəbi nədir?
– Dünya çempionatına yalnız hazırda ən yaxşı formada olan cüdoçuları aparmışıq – bu, çəki dərəcəsindən asılı deyil. Konkret proqnoz vermək istəmirəm, amma dediyim kimi, uşaqların hər biri Limada medal qazanacaq gücə malikdir. Onları məşqlərdə görsəydiniz, özünüz də inanardınız!
Vüqar Vüqarlı
