Idman.biz
"Azərbaycanın gənc cüdoçulardan ibarət millisinin Şimali Makedoniyanın paytaxtı Skopyedə keçirilmiş Avropa Kubokundakı nəticələri uğurlu olub".
İdman.biz xəbər verir ki, bunu "Report"a açıqlamasında yığmanın baş məşqçisi Rüstəm Alimli deyib.
Mütəxəssis əsas məqsədin sentyabrda keçiriləcək Avropa çempionatına hazırlıq olduğunu bildirib: "Əsas məqsəd sentyabrda Slovakiyanın paytaxtı Bratislavada keçiriləcək Avropa çempionatına hazırlıqdır. Bu yarışa əsas heyətlə yollanmışdıq və məqsədimiz uşaqları yoxlamaq idi. Hazırda hansı durumda olmaları, səhvlər və çatışmazlıqlarla bağlı məlumatlar əldə etməyə çalışdıq. Ümumi nəticələrimiz uğurludur. 4 idmançımız qızıl medal qazandı. Komanda hesabında birinci yerə çıxdıq. Əslində, bunu gözləyirdim. Çünki idmançılarımız çox yaxşı formadadırlar".
Alimli qarşıdakı planlara da toxunub: "Bu yarışdan sonra Makedoniyanın paytaxtı Skopyedə 3 günlük təlim-məşq toplanışı olacaq. Daha sonra avqustun 11-dən 23-nə qədər Qubada hazırlıq keçəcəyik. Bu müddətdə səhvləri aradan qaldırmağa və Avropa çempionatına ən yaxşı formada yollanmağa çalışacağıq".
Qeyd edək ki, Azərbaycan millisi Avropa Kubokunda 4 qızıl, 1 gümüş və 1 bürünc medalla 26 ölkə arasında komanda hesabında birinci olub.
İdman.biz
