Idman.biz
Keçmiş cüdoçu Orxan Səfərov məşqçilik karyerasını inkişaf etdirməyə davam edir. Ötən il öz adını daşıyan akademiya açan Avropa çempionu, dünya çempionatlarının ikiqat mükafatçısı, iki Olimpiadada iştirak etmiş idmançı bu günlərdə Latviyadan gələn təklifi qəbul edib. Həmçinin o, "İdman səfiri" kimi MDB Oyunlarına hazırlaşır.
Səfərov İdman.biz-ə müsahibəsində hazırkı fəaliyyətindən danışıb.
- Bu günlərdə Latviyanın "Kyodai" klubunun məşqçilər heyətinə qoşulmusunuz. Vəzifələriniz nələrdən ibarət olacaq?
- Əsas məqsədim illər ərzində beynəlxalq arenada qazandığım təcrübəni paylaşmaqdır. "Kyodai"də aparıcı idmançıların hazırlığı, məşq prosesinin qurulması və gənclərin inkişafına kömək edəcəyəm.
- Ötən il açılan "Orxan Səfərov Akademiyası"nın uğurları necədir?
- Akademiya çox sürətlə inkişaf edir. İlk ildə uşaqlar və yeniyetmələrdən ibarət sabit qruplar formalaşıb, kəmər imtahanları müntəzəm keçirilir, komandalarımız beynəlxalq yarışlara qatılır. Ən çox qürur duyduğum məqam akademiyanın yalnız idman zalı deyil, eyni zamanda uşaqların intizam, hörmət və komandada çalışmağı öyrəndiyi məkan olmasıdır.
- İdmançı karyeranızı başa vurduqdan sonra bir neçə ay Yaponiyada məşqçilik kurslarında oldunuz və orada cüdoya baxışınız tamamilə dəyişdi. Yaponiya təcrübəsindən nəyi praktikada tətbiq edirsiniz?
- Yaponiya mənə cüdonun sadəcə idman olmadığını, həyat tərzi olduğunu göstərdi. Orada idmançının daxili vəziyyətinə və fəlsəfəsinə daha çox diqqət yetirilir. İndi işimdə Avropa hazırlıq metodlarını yapon yanaşması ilə birləşdirərək yalnız güclü cüdoçu deyil, həm də şəxsiyyət yetişdirməyə çalışıram.
- Avropa Cüdo İttifaqı çərçivəsində ustad dərsləri də keçirsiniz. Məşqçi roluna öyrəşmisiniz?
- Bu mənə böyük zövq verir. Gənc idmançıların və məşqçilərin alışıb-yanan gözlərini gördükcə və təcrübəmin başqalarına faydası olduğunu hiss etdikcə böyük motivasiya alıram. Məşqçilik məsuliyyətli missiyadır, çalışıram biliklərimi ən anlaşılan və ilhamverici şəkildə çatdırım.
- Milli komandanın Avropa və dünya çempionatı da daxil olmaqla, mövsümün ilk yarısındakı nəticələrini necə qiymətləndirirsiniz?
- Nəticələr sabitdir, lakin komandanın potensialı çox yüksəkdir. Parlaq qələbələr və medallar var, amma inkişaf etdirilməli məqamlar da mövcuddur. Ən önəmlisi isə tərəqqini və işin düzgün istiqamətdə getməsini görürük.
- Siz Azərbaycanın "İdman səfirləri" komandasındansınız. Yəqin ki, yaxın missiyanız MDB Oyunlarıdır. Oradan nə gözləyirsiniz?
- Bu, Azərbaycan idmanı üçün ilin əsas hadisələrindən biridir. İnanıram ki, idmançılarımız yüksək səviyyə göstərəcək və ölkəmizi layiqincə təmsil edəcəklər.
- Gələcəkdə karyeranızı inkişaf etdirməklə bağlı planlarınız nədir?
- Yaxın vaxtlarda akademiyanı inkişaf etdirməyə, ustad dərslərini və beynəlxalq layihələr vasitəsilə biliklərimi bölüşməyə davam etmək istəyirəm. Uzunmüddətli məqsədim idman strukturlarında rəhbər vəzifə tutaraq cüdonun ölkə və beynəlxalq səviyyədə inkişafına təsir etməkdir.
Zəki Feyzullayev
İdman.biz
