Idman.biz
Olimpiya çempionları Elnur Məmmədli, Hidayət Heydərov və Zelim Kotsoev səfər çərçivəsində şəhər sakinləri ilə görüşüb, burada aparılan tikinti-quruculuq işləri ilə yaxından tanış olublar.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən İdman.biz-a verilən məlumata görə, qonaqlar əvvəlcə Qarabağ Universitetinə baş çəkiblər.
Onlara bu ali təhsil ocağının yaranma tarixi və fəaliyyəti barədə məlumat verilib. Daha sonra idmançılar Xankəndi stadionuna baş çəkib, burada görülən tikinti işləri ilə maraqlanıblar.
Bildirilib ki, yaxın vaxtlarda stadionun yenidənqurma prosesi başa çatdırılacaq.
Qeyd edək ki, "Böyük Qayıdışa dair I Dövlət Proqramı" çərçivəsində işğaldan azad edilmiş ərazilərdə sosial-iqtisadi, mədəni və idman həyatının bərpası istiqamətində ardıcıl tədbirlər icra olunur.
Dövlət başçısı 2024-cü ilin idman yekunlarına həsr olunmuş tədbirdə çıxışı zamanı idmançıların azad edilmiş torpaqlara səfərlərinin gənclər və uşaqlar üçün böyük əhəmiyyət daşıyacağını vurğulayıb Prezidentin bu çağırışına qoşulan idman ictimaiyyəti nümayəndələrinin səfərləri Gənclər və İdman Nazirliyinin təşəbbüsü və dəstəyi ilə həyata keçirilir.
Proqram çərçivəsində Olimpiya çempionlarımızın Şuşa, Laçın, Füzuli və Ağdama da səfərləri və yerli sakinlərlə görüşləri planlaşdırılıb.
****
12:14
Azərbaycanın cüdo üzrə Olimpiya çempionlarının Qarabağa səfəri başlanıb.
İdman.biz xəbər verir ki, iki günlük səfər Azərbaycan Gənclər və İdman Nazirliyi ilə Azərbaycan Cüdo Federasiyasının birgə təşkilatçılığı ilə cüdonun təbliği məqsədilə təşkil edilib.
Elnur Məmmədli, Hidayət Heydərov və Zelim Kotsoyevin qatıldığı səfər müddətində əhali ilə görüşlər keçiriləcək, önəmli və tarixi yerlər ziyarət olunacaq.
Qeyd edək ki, Olimpiya çempionları bu gün Xankəndi və Şuşada, sabah isə Laçın və Füzulidə olacaqlar.
İdman.biz
