Idman.biz
Beynəlxalq Cüdo Federasiyası (IJF) Azərbaycanın qadın cüdosunda tarixi nailiyyətə imza atan Könül Əliyevanın (48 kq) Əbu-Dabidə keçirilən "Böyük Dəbilqə" turnirindəki qələbəsinə xüsusi diqqət ayırıb.
İdman.Biz xəbər verir ki, federasiyanın məlumatında 48 kq çəki dərəcəsində finala yüksələn Əliyevanın turnir boyu üstün çıxışı ilə fərqləndiyinə diqqət çəkib. Onun həlledici görüşdəki rəqibi Türkiyə təmsilçisi Merve Azak olub.
23 yaşlı türkiyəli cüdoçu Əbu-Dabidə uğurlu çıxış edərək karyerasında ilk dəfə Dünya Cüdo Turunda medal qazanmaq imkanı əldə edib. O, finala gedən yolda Olimpiya və dünya çempionatlarının mükafatçısı, İsveç təmsilçisi Tara Babulfat da daxil olmaqla, rəqiblərini məğlub edib.
Final görüşünə daha fəal başlayan Azak ilk hücumu həyata keçirsə də, xal qazana bilməyib. Əliyeva isə rəqibinin təzyiqinə dərhal cavab verərək qısa müddətdə bir vaza-ari və iki yuko xalı əldə edib.
Azərbaycanlı cüdoçu qarşılaşmanın sonunadək üstünlüyünü qoruyub və qələbədən sonra sevincini məşqçisi ilə bölüşüb.
IJF bu nəticəni Azərbaycan qadın cüdosu üçün tarixi uğur kimi qiymətləndirib. Federasiya vurğulayıb ki, bu, ölkənin qadın cüdoçularının Dünya Cüdo Turunda qazandığı ilk qızıl medaldır. Finalda məğlub olan Merve Azak isə karyerasında ilk dəfə "Böyük Dəbilqə" turnirinin mükafatçısı olub.
Könül Əliyeva finaldan sonra açıqlamasında sevincini gizlətməyib:
"İlk dəfə çempion oldum. Bu, mənim ilk "Böyük Dəbilqə" tituludur və çox xoşbəxtəm. Növbəti yarışlarımda da qızıl medal qazanmaq üçün əlimdən gələni edəcəyəm. Olimpiya təsnifatı baxımından bu tempi qorumaq çox vacibdir. Olimpiya Oyunları üçün reytinqdə yüksək mövqe tutmağı da hədəfləyirəm".
48 kq çəki dərəcəsində bürünc medallardan birini rusiyalı Marina Vorobyova qazanıb. O, üçüncü yer uğrunda görüşdə fransalı Melani Lequ-Klemanı parterdə ipponla məğlub edib.
Digər bürünc medalın sahibi Türkiyə təmsilçisi Sıla Ersin olub. Onun portuqaliyalı Katarina Kosta ilə görüşündə uzun müddət xal qeydə alınmayıb. Sonradan Kosta yalançı hücumlara görə cəzalandırılıb və hansoku-make ilə məğlub olub. Ersin bununla karyerasında üçüncü "Böyük Dəbilqə" bürünc medalını qazanıb.
Qeyd edək ki, mükafatlandırma mərasimində medalları, pul mükafatlarını və gülləri IJF prezidenti Marius Vizer və Asiya Muay-Tay Federasiyasının baş icraçı direktoru Tareq Əl Mheyri təqdim ediblər.
