İdman.biz
"Komandanın son vəziyyətinə baxanda cüdoçularımızın hər birindən medal gözləyirik. Onlar bunu bacaracaq gücdədir".
Bunu "İdman Bizdə" verilişinin qonağı olan Azərbaycan millisinin sabiq cüdoçusu Orxan Səfərov deyib.
Avropa çempionu dünya çempionatında yığmamızdan gözləntilərindən danışıb. O bildirib ki, cüdoçularımızın 3 qızıl medal qazanacağına inanır: "Komandada hər kəsin medal qazana biləcək gücdə olduğu müzakirə olunmur. Çempionluğa qaldıqda, Hidayət Heydərov (73 kq), Elcan Hacıyev (90 kq) və Zelim Kotsoyevdən (100 kq) bunu gözləyirəm. 60 və 66 kq-da çox güclü rəqabət var. Yaponlar məhz bu çəkilərdə 2 cüdoçu ilə təmsil olunacaqlar. Oradakı rəqabətin çox güclü olacağını hamımız bilirik".
Səfərov cüdoçularımıza BƏƏ-də dəstək olacağını da bildirib: "Hər zaman deyirdim ki, yəqin bir gün mən də idmandan ayrılıb dünya çempionatını rahat izləyə biləcəm. Həm yarışa baxacam, həm də orda İdman səfiri kimi təmsil olunacam. Komandamıza dəstəyimi verəcəm. Yığmada peşəkar məşqçilər işləyir. Onlar hər biri öz tövsiyələrini yarışdan əvvəl verirlər. Bizim əlimizdən gələn isə tribunadan onlara dəstək olmaqdır".
Qeyd edək ki, dünya çempionatı mayın 19-dan 24-ə kimi BƏƏ-nin Abu-Dabi şəhərində keçiriləcək.
Emin Ağa
İdman.biz
