Idman.biz
Azərbaycanlı cüdoçu Elcan Hacıyev (90 kq) ardıcıl ikinci Universiadada medal qazanıb.
İdman.biz-in Almaniyaya ezam olunmuş əməkdaşı xəbər verir ki, o, ilk dəfə iki il əvvəl Çində, Çenqdu şəhərində keçirilən Universiadada fərqlənmişdi.
Onda Hacıyev komanda yarışında bürünc medal qazanmışdı. Üçüncü yer uğrunda görüşdə kişi cüdoçularımız Monqolustanı məğlub etmişdilər.
Hazırda Almaniyanın Reyn-Rur bölgəsində davam edən Universiadada isə Hacıyev şəxsi yarışlarda gümüş medal əldə edib.
Qeyd edək ki, Azərbaycan idman tarixində ardıcıl iki Universitet Oyunlarında fərqlənmiş bir neçə idmançı var. Məsələn, Nazim Babayev 2017 və 2019-cu illərdə keçirilən Universiadalarda uzunluğa tullanmada qalib olub. Gimnast Zöhrə Ağamirova isə 2019-cu ildə Neapolda iki gümüş medal qazanıb, Çenqduda isə bu uğura iki gümüş və bir bürünc medal əlavə edib.
İdman.biz
