İdman.biz
"Avropa çempionatında çox yaxşı iştirak etdik".
İdman.biz xəbər verir ki, bunu Azərbaycan millisinun cüdoçusu Əjdər Bağırov Heydər Əliyev Beynəlxalq Aeroportunda qarşılanma mərasimində deyib.
O, Estoniyanın Tallin şəhərində keçirilən cüdo üzrə gənclər arasında Avropa çempionatındakı çıxışını dəyərləndirib.
Bağırov bildirib ki, kubok bütün komandanın gücünün nəticəsində qazanılıb: "Hər bir idmançımızın burada böyük əziyyəti var. Daim bizim komanda yarışında əzəli rəqibimiz Fransa olub. Final görüşünə bu səbəbdən olduqca emosional yanaşdıq. Həmyerlilərimizin bizə olan dəstəyi əvəsziz idi. Çox gözəl abu-hava var idi. Himnimiz səslənəndə keçirdiyim hissləri yalnız yaşamaqla bilmək olar. Sevinirik ki, həm fərdi, həm də komanda yarışlarında yaxşı çıxış etdik".
Onun sözlərinə görə, bundan sonraki əsas hədəf qarşıdan gələn dünya çempionatında yüksək nəticə əldə etməkdir: "Dünya çempionatından da Azərbaycana qızıl medallarla dönmək istəyirik".
Qeyd edək ki, komandamız dörd qızıl, iki gümüş və iki bürünc medal qazanaraq fərdi Avropa çempionatının ümumi hesabında birinci yeri tutub.
Banuçiçək Hüseynli
İdman.biz
