Idman.biz
"Sevdiklərimi burada bir arada gördükdən sonra sanki daha da cavanlaşdım".
İdman.biz xəbər verir ki, bunu AZƏRTAC-a açıqlamasında bu gün 80 illik yubileyini qeyd edən Azərbaycanın tanınmış idman veteranı, keçmiş cüdoçu Əhməddin Rəcəbli deyib.
13 ildir təqaüdə çıxdığını söyləyən Əməkdar məşqçi idmanın inkişafında göstərdiyi səylərə verilən qiymətə görə xoşbəxt olduğunu bildirib: "Nə yaxşı ki, idman veteranlarını unutmurlar və belə günlərdə də yada salırlar. Çiyin-çiyinə vuruşduğum dostlarım hazırda buradadırlar. Vaxtilə onlarla sağlam rəqabətimiz olub. Amma bir o qədər də yaxşı dost, sirdaş olmuşuq. Şükürlər olsun ki, mənim və həmkarlarımın səyləri nəticəsində Azərbaycan cüdosu dünya arenasında dəfələrlə öz sözünü deyib".
O, idmanla məşğul olan Azərbaycan gənclərinə uğurlar arzulayıb, daim öz üzərlərində işləmələri üçün motivasiya verib: "Azərbaycan Bayrağını həmişə ən yüksəklərdə dalğalandırsınlar. Möhkəm və iradəli olsunlar. Məğlubiyyət yaşayan kimi ruh düşkünlüyü olmasın. Bu, idmançı üçün ən pis keyfiyyətdir. Özlərinə inansınlar, heç nə nədən və heç kimdən çəkinməsinlər".
İdman.biz
