Report.az
Çexiyanın paytaxtı Praqada keçirilən gənclər arasında Avropa Kubokunda gümüş medal qazanan Azərbaycan cüdoçusu Davud Namazlı (100 kq) ən çətin döyüşünü 1/4 finalda ABŞ idmançısına qarşı keçirib.
Bu barədə cüdoçu "Report"a açıqlama verib.
O, finala çıxa bilməməsinin səbəbini də açıqlayıb:
"Görüşlərim ümumilikdə yaxşı keçdi. Finala qədər məğlub etdiyim rəqiblərin hər biri titullu, güclü idmançılar idi. Ən çətin rəqibim 1/4 finalda qarşılaşdığım ABŞ cüdoçusu oldu. "Qızıl xal"a qədər davam etdik. Finala çıxa bilməməyimin səbəbi isə bəzi texniki çatışmazlıqlar oldu".
D.Namazlı bu il üçün ən böyük hədəflərini açıqlayıb:
"Qarşıdan Universiada gəlir. Burada qazandığım gümüş medalı həmin yarışda qızıla çevirməyə çalışacağam. Bu il ən böyük hədəfim isə gənclər arasında Avropa və dünya çempionatının qalibi olmaqdır".
Qeyd edək ki, Avropa Kubokunda 32 ölkədən 428 cüdoçu mübarizə aparıb.
