Idman.biz
AJP Tour tərəfindən təşkil olunan Ciu-Citsu Dünya Çempionatı noyabrın 16-da Əbu-Dabidə baş tutub və yarışda çıxış edən iki idmançımız - Bağır Əliyev və Timur Simvol uğurlu nəticə göstərib.
İdman.Biz xəbər verir ki, sarı kəmər, 62 kq-a qədər yeniyetmələr kateqoriyasında mübarizə aparan Bağır Əliyev ardıcıl olaraq Qazaxıstanın iki ən güclü idmançısını, bir Ukrayna təmsilçisini və bir ərəb idmançısını məğlub edərək qızıl medal qazanıb.
Digər idmançı Timur Simvol da etibarlı çıxış edib. O, iki ukraynalı, bir qazax və bir amerikalı rəqibini məğlub edərək bütün döyüşlərdə tam üstünlük nümayiş etdirib və qızıl medal əldə edib.
Hər iki idmançının nəticəsi illərin məşq zəhmətinin təsdiqi kimi dəyərləndirilir.
Bu iki zəfər Bakı ciu-citsu məktəbinin beynəlxalq arenadakı gücünü bir daha ortaya qoyub. Uğurlar həm gənc idmançıların xarakterinin və intizamının göstəricisi, həm də ölkənin nüfuzunun yüksəlməsinə mühüm töhfədir.
